اٹلی کے سابق وزیر اعظم اور یورپی کمشنر پاؤلو جینٹی لونی نے پاکستان کی سفارتی کوششوں کو غیر معمولی قرار دیتے ہوئے کہا کہ موجودہ حالات میں نوبیل انعام کا اصل حق دار شاید پاکستان ہے۔
انہوں نے سوشل میڈیا پلیٹ فارم ایکس پر اپنے بیان میں پاکستان کی کاوشوں کو سراہا۔ عالمی سطح پر دیگر ممالک نے بھی امریکا ایران جنگ بندی کا خیرمقدم کیا ہے، جن میں سعودی عرب، متحدہ عرب امارات، عمان، قطر اور اردن شامل ہیں۔
Forse merita il Nobel. Il Pakistan.
— Paolo Gentiloni (@PaoloGentiloni) April 8, 2026
چین، روس اور یورپی ممالک نے بھی اس پیشرفت کو خوش آئند قرار دیا ہے۔ چینی وزارت خارجہ کا کہنا ہے کہ مشرق وسطیٰ میں پائیدار امن کے قیام کے لیے چین اپنی کوششیں جاری رکھے ہوئے ہے۔
مزید پڑھیں: نوبل امن انعام تو بنتا ہے
برطانوی وزیر اعظم کیئر سٹارمر نے جنگ بندی کو مستقل امن معاہدے میں تبدیل کرنے کی اہمیت پر زور دیا، جبکہ فرانسیسی صدر ایمانوئل میکرون نے اس پیشرفت کا خیرمقدم کرتے ہوئے لبنان کی صورتحال پر تشویش کا اظہار کیا۔
جرمن چانسلر اولاف شولز نے جنگ بندی میں کردار ادا کرنے پر پاکستان کا شکریہ ادا کیا، جبکہ ترکیے نے اسلام آباد میں مذاکرات کی مکمل حمایت کا اعلان کیا۔ اسی طرح آسٹریلیا، مصر اور ملائیشیا نے بھی جنگ بندی کا خیرمقدم کیا ہے۔
روس نے امید ظاہر کی ہے کہ اس پیشرفت کے بعد امریکا اور ایران کے درمیان براہ راست مذاکرات کا آغاز ہوگا، جبکہ امریکا کو یوکرین کے ساتھ مذاکرات دوبارہ شروع کرنے کے لیے مزید مواقع میسر آئیں گے۔
مزید پڑھیں: پاکستان نے دنیا کو جنگ سے بچایا، نوبیل انعام ملنا چاہیے، مسعود خان
اقوام متحدہ کے سیکریٹری جنرل اور کیتھولک مسیحیوں کے روحانی پیشوا پوپ لیو نے بھی جنگ بندی کا خیرمقدم کرتے ہوئے اسے عالمی امن کے لیے مثبت قدم قرار دیا ہے۔
