وزیرِ اعظم شہباز شریف کی زیرِ صدارت قومی اقتصادی کونسل (این ای سی) کا اہم اجلاس، جو کل 3 جون 2026 کو منعقد ہونا تھا، آئندہ بجٹ پر مزید مشاورت کے لیے مؤخر کر دیا گیا ہے۔
کابینہ ڈویژن کی جانب سے جاری کردہ نوٹس کے مطابق، 3 جون 2026 بروز بدھ منعقد ہونے والا این ای سی کا اجلاس مؤخر کر دیا گیا ہے۔ اجلاس کی نئی تاریخ کا اعلان بعد میں کیا جائے گا۔
یہ بھی پڑھیں: صنعتی ترقی، برآمدات اور بیرونی سرمایہ کاری میں اضافے کے لیے جامع اصلاحات ناگزیر ہیں، وزیراعظم
قومی اقتصادی کونسل پاکستان کا اعلیٰ ترین آئینی فورم ہے جو وفاق اور صوبوں کے درمیان اقتصادی منصوبہ بندی اور ہم آہنگی کے امور کی نگرانی کرتا ہے۔
میڈیا رپورٹس کے مطابق این ای سی کے اجلاس کی اچانک ملتوی ہونے سے یہ تاثر پیدا ہوا ہے کہ وفاقی بجٹ کی پیشی میں بھی تاخیر ہو سکتی ہے۔
قومی اقتصادی کونسل کا تین جون کو بلایا گیا اجلاس ملتوی ۔ پانچ جون کو بجٹ پیش کرنے کا معاملہ بھی لٹک گیا نئی تاریخوں کا فیصلہ تاحال نہ ہو سکا۔#budget2026 pic.twitter.com/CMfYlMJaje
— Sanaullah Khan (@SanaullahDawn) June 2, 2026
حکومت کی جانب سے مالی سال 27-2026 کا وفاقی بجٹ 5 جون 2026 کو پیش کیے جانے کی توقع ہے، تاہم متوقع بجٹ مشاورت کے باعث ذرائع کا کہنا ہے کہ بجٹ 5 جون کے بجائے 8 یا 12 جون کو پیش کیے جانے کا امکان ہے۔
حکومت آئندہ مالی سال کے لیے مجموعی قومی پیداوار کی شرح نمو 4 فیصد رکھنے کا ہدف مقرر کرنے پر غور کر رہی ہے۔
مزید پڑھیں: نور محمد دمڑ کو قومی اقتصادی کونسل اجلاس میں شرکت مہنگی پڑگئی
یہ بجٹ ایسے وقت میں تیار کیا جا رہا ہے جب پاکستان آئی ایم ایف کی عائد کردہ سخت مالیاتی شرائط اور کفایت شعاری کے اقدامات کے تحت اقتصادی استحکام کی پالیسی پر عمل پیرا ہے۔
میڈیا رپورٹس کے مطابق بجٹ تجاویز اور اقتصادی اہداف پر مزید غور و خوض کے لیے قومی اقتصادی کونسل کے اجلاس کو مؤخر کیا گیا ہے، جبکہ اجلاس کی نئی تاریخ کا اعلان جلد متوقع ہے۔
