حج 2026 کی کامیاب تکمیل کے بعد سعودی عرب سے لاکھوں عازمینِ حج کی اپنے اپنے ممالک واپسی کا عمل شروع ہو گیا ہے۔ سعودی حکومت نے حجاج کرام کی روانگی کو منظم، محفوظ اور آسان بنانے کے لیے ملک بھر کے ہوائی اڈوں، بندرگاہوں اور زمینی سرحدی گزرگاہوں پر خصوصی انتظامات مکمل کر لیے ہیں۔
سعودی پریس ایجنسی کے مطابق خادم الحرمین الشریفین پروگرام برائے حج، عمرہ و زیارت کے تحت آنے والے مہمانوں کی پہلی پروازیں مدینہ منورہ سے روانہ ہو چکی ہیں۔ حجاج کرام نے مناسکِ حج کی ادائیگی اور مسجد نبویؐ کی زیارت کے بعد اپنے وطنوں کی جانب سفر کا آغاز کیا۔ عازمین کو شہزادہ محمد بن عبدالعزیز بین الاقوامی ہوائی اڈہ، مدینہ منورہ کے ذریعے روانہ کیا گیا۔
The first groups of post-#Hajj pilgrims have departed through #Madinah, #Jeddah and #Riyadh as Saudi Arabia activates comprehensive plans to ensure smooth and efficient travel home for worshippers from around the world. #Hajj2026 https://t.co/yYiJyqSIag pic.twitter.com/mOvIvwkDqL
— Arab News (@arabnews) June 3, 2026
سعودی وزارتِ اسلامی امور، دعوت و ارشاد کے مطابق پروگرام کے شرکا نے روضۂ رسولؐ کی حاضری کے ساتھ ساتھ مختلف تاریخی اور ثقافتی مقامات کا بھی دورہ کیا۔
وزارت کا کہنا ہے کہ حجاج کو دینی، تعلیمی اور ثقافتی سرگرمیوں میں شرکت کا موقع فراہم کیا گیا تاکہ وہ اسلامی تعلیمات سے مزید آگاہی حاصل کر سکیں اور حرمین شریفین کے زائرین کی خدمت کے لیے سعودی عرب کی کاوشوں کو قریب سے دیکھ سکیں۔
حجاج کرام نے حج انتظامات پر اطمینان کا اظہار کرتے ہوئے رہائش، ٹرانسپورٹ، طبی سہولیات اور دیگر خدمات کو سراہا۔ متعدد شرکا نے سعودی قیادت کا شکریہ ادا کیا کہ انہیں خادم الحرمین الشریفین پروگرام کے تحت حج کی سعادت حاصل ہوئی، جس کے ذریعے ہر سال دنیا بھر سے ہزاروں مسلمانوں کو سرکاری اخراجات پر حج کی دعوت دی جاتی ہے۔
دوسری جانب سعودی محکمہ پاسپورٹ نے اعلان کیا ہے کہ جدہ اسلامی بندرگاہ اور شاہ خالد بین الاقوامی ہوائی اڈہ، ریاض سے روانہ ہونے والے حجاج کے پہلے گروپوں کی سفری کارروائیاں کامیابی سے مکمل کر لی گئی ہیں۔ ادارے کے مطابق تمام فضائی، بحری اور زمینی راستوں پر اضافی عملہ اور وسائل تعینات کیے گئے ہیں تاکہ حجاج کرام کی واپسی کے مراحل تیز رفتاری اور سہولت کے ساتھ مکمل کیے جا سکیں۔
سعودی جنرل اتھارٹی برائے شماریات کے اعداد و شمار کے مطابق رواں سال 17 لاکھ سے زائد افراد نے فریضۂ حج ادا کیا۔ ان میں 15 لاکھ سے زیادہ بیرونِ ملک سے آنے والے حجاج شامل تھے، جبکہ ایک لاکھ 60 ہزار 646 سعودی شہریوں اور مملکت میں مقیم افراد نے بھی حج کی سعادت حاصل کی۔
یہ بھی پڑھیں:’بیگز کے تالے توڑ کر لاکھوں روپے کا سامان نکال لیا گیا‘، لکھنؤ ایئرپورٹ پر حجاج کے ساتھ بڑی چوری
سعودی حکام کے مطابق حج 2026 کے کامیاب انعقاد کے بعد اب توجہ حجاج کرام کی محفوظ، آرام دہ اور منظم وطن واپسی پر مرکوز ہے، جس کے لیے تمام متعلقہ ادارے ہمہ وقت خدمات انجام دے رہے ہیں۔
