وفاقی وزیر برائے پیٹرولیم علی پرویز ملک نے پیٹرولیم اور گیس کے شعبے کے حوالے سے اہم حکومتی پالیسیوں پر روشنی ڈالتے ہوئے اعلان کیا ہے کہ حکومت آنے والے بجٹ میں گھریلو گیس صارفین کو بڑی خوشخبری دے گی۔
بدھ کو میڈیا سے گفتگو کرتے ہوئے علی پرویز ملک نے پیٹرولیم مصنوعات پر ٹیکسز، ایل این جی معاہدوں اور اسٹریٹجک پالیسیوں سمیت مختلف امور پر کھل کر بات چیت کی۔
پیٹرولیم ٹیکسز اور گیس صارفین کے لیے ریلیف
میڈیا سے گفتگو کے دوران وفاقی وزیرپیٹرولیم کا کہنا تھا کہ پیٹرولیم مصنوعات پر ٹیکس عائد کرنا ایک پیچیدہ مسئلہ ہے، لیکن موجودہ معاشی حالات کے پیشِ نظر وہ اسے براہِ راست کنٹرول کرنے سے قاصر ہیں۔
تاہم انہوں نے عوام کو امید دلائی کہ حکومت گھریلو گیس صارفین کی مشکلات سے آگاہ ہے اور آئندہ وفاقی بجٹ میں ان کے لیے ریلیف کی صورت میں خوشخبری کا اعلان کیا جائے گا۔
شاہد خاقان عباسی کے کردار اور قطر کے تعاون کا اعتراف
سابق وزیراعظم شاہد خاقان عباسی کی خدمات کا اعتراف کرتے ہوئے علی پرویز ملک نے کہا کہ انہوں نے ماضی میں قطر کے ساتھ ایل این جی معاہدے کی تیاری اور اسے حتمی شکل دینے میں انتہائی شاندار کردار ادا کیا تھا۔
انہوں نے مزید کہا کہ جب شاہد خاقان عباسی مسلم لیگ (ن) کا حصہ تھے، تو انہوں نے پیٹرولیم کے شعبے میں بہترین کام کیا تھا۔ وزیر پیٹرولیم نے مشکل وقت میں دوست ممالک کے تعاون کا ذکر کرتے ہوئے کہا کہ قطر کی حکومت نے مشرقِ وسطیٰ کی جنگ کے دوران بھی پاکستان کے ساتھ اپنا بھرپور تعاون جاری رکھا، جو قابلِ ستائش ہے۔
وزارت کے فیصلے اوراسٹریٹجک تیل کے ذخائر کا جائزہ
وزارت کے اندرونی طریقہ کار کے حوالے سے بات کرتے ہوئے وفاقی وزیر نے واضح کیا کہ پیٹرولیم ڈویژن کے تمام اہم اور اسٹرٹیجک فیصلے وہ سیکریٹری پیٹرولیم کی مشاورت اور باہمی رضامندی سے کرتے ہیں۔
انہوں نے یہ بھی انکشاف کیا کہ ملک میں اسٹریٹجک تیل کے ذخائر کے حوالے سے موجودہ پالیسی کا تفصیلی جائزہ لیا جا رہا ہے تاکہ کسی بھی ہنگامی صورتحال سے نمٹا جا سکے۔
ڈی ریگولیشن کے اقدامات پر زور
وفاقی وزیر پیٹرولیم علی پرویز ملک نے ملکی معیشت اور پیٹرولیم سیکٹر کی بہتری کے لیے حکومت پر زور دیا کہ وہ پیٹرولیم سیکٹر میں ’ڈی ریگولیشن‘ (صنعت کو حکومتی کنٹرول سے آزاد کرنے) کے اقدامات کو تیزی سے آگے بڑھائے، تاکہ مارکیٹ میں صحت مند مقابلے کی فضا قائم ہو سکے اور صارفین کو طویل مدتی فائدہ پہنچے۔
