سعودی محکمہ موسمیات نے کہا ہے کہ موسمِ گرما 2026 کے لیے موسمیاتی پیش گوئیوں کے مطابق مملکت کے تمام علاقوں میں درجہ حرارت معمول سے زیادہ رہنے کا امکان ہے، جبکہ مختلف علاقوں میں بارشیں معمول کے برابر یا اس سے کم متوقع ہیں۔
سعودی نیشنل سینٹر فار میٹرولوجی کی جانب سے جاری کردہ موسمیاتی رپورٹ کے مطابق جون کے دوران مملکت بھر میں بارشوں کی مقدار عمومی طور پر معمول کے مطابق رہنے کی توقع ہے۔
یہ بھی پڑھیں: سعودی عرب کا شمالی سرحدی علاقہ لائیو اسٹاک کا بڑا مرکز بن گیا، غذائی تحفظ کے مشن میں اہم پیشرفت
رپورٹ میں کہا گیا ہے کہ جولائی کے دوران جازان، الباحہ، عسیر کے بعض حصوں، مکہ مکرمہ، نجران اور مشرقی علاقوں میں بارشیں اوسط سے کم ہو سکتی ہیں، جبکہ مملکت کے دیگر علاقوں میں بارشوں کی صورتحال معمول کے مطابق رہنے کا امکان ہے۔
محکمہ موسمیات کے مطابق جون میں جازان، الباحہ، مکہ مکرمہ، عسیر، مدینہ منورہ، ریاض، القصیم، حائل اور تبوک کے بعض علاقوں میں درجہ حرارت معمول سے 1.5 ڈگری سینٹی گریڈ تک زیادہ رہ سکتا ہے۔
مزید پڑھیں: سعودی عرب کا ماحول دوست سیاحتی منصوبہ ’العُرومہ سیزن‘، 6 ماہ میں 8 لاکھ سے زائد سیاحوں کی آمد
اسی طرح جولائی اور اگست کے دوران جازان، الباحہ، عسیر اور مکہ مکرمہ کے بعض حصوں میں درجہ حرارت معمول سے 1.6 ڈگری سینٹی گریڈ تک بڑھنے کی توقع ہے۔
نیشنل سینٹر فار میٹرولوجی نے متعلقہ اداروں اور سروس سیکٹرز پر زور دیا ہے کہ وہ گرمیوں کے موسمی حالات سے نمٹنے کے لیے اپنی تیاریوں اور منصوبہ بندی کو مؤثر بنانے کی غرض سے مرکز کی جانب سے جاری کردہ سرکاری رپورٹس اور تازہ ترین معلومات پر مسلسل نظر رکھیں۔
