وزیر اعلیٰ پنجاب مریم نواز شریف کی ہدایات پر صوبے بھر میں اسموگ اور ماحولیاتی آلودگی کا باعث بننے والے غیر قانونی صنعتی یونٹس کے خلاف کریک ڈاؤن مزید تیز کر دیا گیا ہے۔
محکمہ ماحولیات کے مطابق لاہور میں ماحولیات کے لیے خطرہ بننے والی غیر قانونی فیٹ ملٹنگ فیکٹریوں اور جانوروں کے اعضا جلانے والے یونٹس کے خلاف خصوصی کریک ڈاؤن جاری ہے۔
گزشتہ 15 روز کے دوران لاہور میں آلودگی کا سبب بننے والے 64 سے زائد غیر قانونی یونٹس کے خلاف کارروائی کی گئی جبکہ گزشتہ 2 برسوں میں مجموعی طور پر 374 غیر قانونی یونٹس بند کیے جا چکے ہیں۔
یہ بھی پڑھیں: فیکٹ چیک: کیا پنجاب حکومت نے لاہور کی مختلف سڑکوں کے تقسیم ہند سے پہلے کے نام بحال کردیے؟
حکام کے مطابق کارروائیاں دھواں، بدبو اور ماحولیاتی آلودگی پھیلانے والی فیکٹریوں کے خلاف کی گئیں، اسی سلسلے میں بکر منڈی کے علاقے میں غیر قانونی طور پر جانوروں کی چربی پگھلانے اور کچرا جلانے والے یونٹس کے خلاف بھی کارروائی کی گئی۔
یہ یونٹس ماحولیاتی قوانین کی خلاف ورزی کرتے ہوئے کھلے عام چربی پگھلانے اور کچرا جلانے میں ملوث تھے، جس کے باعث علاقے میں شدید فضائی آلودگی اور تعفن پھیل رہا تھا۔
محکمہ ماحولیات نے مقامی رہائشیوں کی شکایات پر چھاپہ مار کارروائی کرتے ہوئے متعلقہ یونٹس کو سیل کرتے ہوئے مشینری اپنی تحویل میں لے لی۔
مزید پڑھیں: پنجاب حکومت نے اب تک کتنے لاکھ زمینداروں میں ’کسان کارڈ‘ تقسیم کیے؟
علاقہ مکینوں نے وزیر اعلیٰ پنجاب مریم نواز شریف کے ماحول دوست اقدامات کو سراہتے ہوئے کہا کہ برسوں سے موجود ماحولیاتی مسائل کو پہلی مرتبہ سنجیدگی سے حل کیا جا رہا ہے۔
شہریوں کا کہنا تھا کہ حکومتی اقدامات سے نہ صرف ماحول بہتر ہوگا بلکہ آلودگی سے پیدا ہونے والی بیماریوں میں بھی کمی آئے گی۔
حکومت پنجاب نے بڑے شہروں، صنعتی زونز اور رہائشی علاقوں میں قائم ایسے یونٹس کے خلاف بلاامتیاز کارروائی کا فیصلہ کرتے ہوئے محکمہ تحفظ ماحولیات کی ٹیموں کو یونین کونسل کی سطح تک گرینڈ آپریشن کے احکامات جاری کر دیے ہیں۔
مزید پڑھیں: پنجاب حکومت کا شرمپ فارمنگ کا منصوبہ کیا ہے، لوگ کیسے فائدہ اٹھا سکتے ہیں؟
سینیئر صوبائی وزیر مریم اورنگزیب نے کہا ہے کہ صحت عامہ سے کھلواڑ کرنے والوں کے خلاف زیرو ٹالرنس پالیسی اختیار کی گئی ہے اور اسموگ کا باعث بننے والی تمام سرگرمیوں پر مکمل پابندی عائد ہے۔
انہوں نے خبردار کیا کہ خلاف ورزی کی صورت میں سخت قانونی کارروائی عمل میں لائی جائے گی جبکہ غیر قانونی یونٹس کو فوری طور پر مسمار کر کے ان کے مالکان کے خلاف مقدمات درج کیے جائیں گے۔
مزید پڑھیں: پنجاب کا سنیما انڈسٹری کیلئے ریلیف، اوقات کار میں نرمی پر فہد مصطفیٰ کا ردعمل سامنے آگیا
انہوں نے کہا کہ عوام الناس حکومتی اقدامات پر عملدرآمد یقینی بنائیں اور غیر قانونی یونٹس کے مالکان رضاکارانہ طور پر اپنی سرگرمیاں بند کر دیں، بصورت دیگر انہیں مسمار کر دیا جائے گا۔
مریم اورنگزیب کے مطابق وزیر اعلیٰ پنجاب کی واضح ہدایات ہیں کہ کسی بھی غیر قانونی پلانٹ یا اسموگ کا باعث بننے والے یونٹ کو رعایت نہیں دی جائے گی، کیونکہ اسموگ کا خاتمہ حکومت پنجاب کی اولین ترجیح ہے۔
