پنجاب حکومت نے سنیما گھروں کے اوقات کار سے متعلق عائد پابندیوں میں نرمی کا فیصلہ کر لیا ہے جس پر اداکار فہد مصطفیٰ نے خوشی کا اظہار کیا ہے۔
فہد مصطفیٰ نے صوبائی حکومت کی جانب سے جاری کردہ نوٹیفکیشن اپنے انسٹاگرام اکاؤنٹ پر شیئر کرتے ہوئے وزیراعلیٰ پنجاب مریم نواز کا شکریہ ادا کیا اور کہا کہ اس فیصلے سے فلم بینوں کو بہتر سہولت میسر آئے گی۔
اداکار نے اپنی پوسٹ کے کیپشن میں لکھا ’ہاں بھئی پنجاب والو وزیراعلیٰ مریم نواز نے آپ کے لیے سنیما کھول دیے ہیں، اب جا کر ہماری فلم دیکھیں‘۔
View this post on Instagram
واضح رہے کہ فہد مصطفیٰ نے گزشتہ روز پنجاب کی سینئر وزیر مریم اورنگزیب کو ایک خط بھی لکھا تھا جس میں انہوں نے سنیما گھروں کے اوقات کار میں توسیع کی درخواست کی تھی۔ ان کا کہنا تھا کہ اس وقت سنیما شام 8 بجے بند ہونے کے باعث نئی ریلیز ہونے والی فلموں کو مناسب رسائی حاصل نہیں ہو پا رہی۔
نئی پالیسی کے تحت پنجاب حکومت نے اوقات کار میں نرمی کی ہے۔ اس کے مطابق دکانیں، بازار اور شاپنگ مالز رات 9 بجے بند ہوں گے جبکہ شادی ہالز اور تقریبات کے مقامات 10 بجے تک کھلے رہیں گے۔
یہ بھی پڑھیں: سنیماز کی جلد بندش پر تشویش، فہد مصطفیٰ نے پنجاب حکومت سے بڑا مطالبہ کردیا
ریسٹورنٹس، کیفے، سنیما گھروں، کھانے پینے کے مراکز اور سبزی و فروٹ کی دکانوں کے لیے بندش کا وقت رات 11 بجے مقرر کیا گیا ہے۔
تاہم بیکریاں، تندور، دودھ کی دکانیں، پٹرول پمپس، سی این جی اسٹیشنز، الیکٹرک وہیکل چارجنگ اسٹیشنز، جم، اسپورٹس سہولیات، پیڈل کورٹس، آئی ٹی کمپنیاں اور کال سینٹرز کو ان پابندیوں سے مستثنیٰ قرار دیا گیا ہے۔
یہ بھی پڑھیں: فینز کے درمیان اکتاہٹ یا غلط فہمی؟ صبورعلی کی وائرل ویڈیو نے تنازع کھڑا کردیا
اسی طرح اسپتال، کلینکس، لیبارٹریز، فارمیسیز اور طبی سامان کی دکانیں بھی اپنی ضروری نوعیت کے باعث پابندیوں سے مستثنیٰ رہیں گی۔
اداکارہ مہوش حیات نے بھی فہد مصطفیٰ کی پوسٹ پر خوشی کا اظہار کیا جبکہ صارفین کی جانب سے بھی حکومت کے اس فیصلے کو سراہا گیا۔
