فٹبال کی عالمی گورننگ باڈی ’فیفا‘ نے ویب سائٹ پر آنے والی ایک تکنیکی خرابی کے باعث تقریباً 60 شائقین کو غلطی سے مفت جاری ہونے والے ورلڈ کپ کے ٹکٹ منسوخ کردیے ہیں۔
فیفا کی جانب سے جاری کردہ بیان کے مطابق، یہ ٹکٹ 21 مئی کو ویب سائٹ پر چیک آؤٹ کے عمل کے دوران ادائیگی کے نظام میں خرابی کی وجہ سے بغیر کسی چارج کے الاٹ ہوگئے تھے۔
یہ بھی پڑھیں: فیفا ورلڈ کپ 2026: آن لائن ٹکٹوں کی فروخت کا بڑا فراڈ، 36 جعلی ویب سائٹس متحرک، الرٹ جاری
عالمی ادارے نے اس سنگین غلطی اور شائقین کو ہونے والی زحمت پر معذرت کا اظہار کیا ہے، تاہم واضح کیا ہے کہ یہ ٹکٹ ان شائقین کے نام پر فی الحال صرف ’ریزرو‘ رکھے گئے ہیں اور انہیں ای میل کے ذریعے دعوت دی گئی ہے کہ وہ مقررہ وقت کے اندر ٹکٹوں کی اصل اور پوری رقم ادا کر کے اپنی نشستیں پکی کرلیں۔
ورلڈ کپ کا میگا ایونٹ آئندہ جمعرات سے میکسیکو سٹی میں شروع ہونے جارہا ہے، اور ٹکٹوں کی فروخت کا یہ نظام پہلے ہی شدید تنازعات کا شکار ہے۔
نیویارک اور نیو جرسی کے اٹارنی جنرلز نے فیفا کے ٹکٹنگ کے طریقہ کار، نشستوں کے مقامات اور قیمتوں میں ممکنہ صارفین کے حقوق کی خلاف ورزیوں پر تحقیقات شروع کر رکھی ہیں اور فیفا کو باقاعدہ نوٹس بھی جاری کیا جاچکا ہے۔
یہ بھی پڑھیں: 104 میچز، 48 ٹیمیں اور اربوں شائقین، فیفا ورلڈ کپ 2026 میں کیا کچھ نیا ہونے جارہا ہے؟
یہ تکنیکی خرابی ایک ایسے وقت میں سامنے آئی ہے جب فیفا کے صدر جانی انفینٹینو نے تین ماہ قبل ہی تمام 104 میچز کے مکمل طور پر سولڈ آؤٹ ہونے کا دعویٰ کیا تھا، مگر اب بھی فیفا کی ویب سائٹ پر متعدد میچز کے ٹکٹ دستیاب ہیں۔
شائقین نے اس بار ٹکٹوں کی حد سے زیادہ قیمتوں اور فیفا کے ’سرج پرائسنگ‘ ماڈل پر سخت تنقید کی ہے، جہاں کم ڈیمانڈ والے میچز کی قیمتوں اور فیفا کے اپنے ری سیل پلیٹ فارم پر وصول کیے جانے والے 15 فیصد کمیشن کو لے کر شدید بے چینی پائی جاتی ہے۔
