کینیڈا میں ایک چونکا دینے والا اسکینڈل سامنے آیا ہے جہاں ایئر کینیڈا کے ایک سابق کیپٹن پر الزام ہے کہ وہ تقریباً 17 سال تک بغیر درست لائسنس کے مسافروں کو لے کر سینکڑوں ملکی و بین الاقوامی پروازیں چلاتا رہا۔
الجزیرہ کے مطابق 59 سالہ پائلٹ جیوفری وال کو پولیس نے فراڈ اور جعلی دستاویزات استعمال کرنے سمیت متعدد الزامات کے تحت گرفتار کیا ہے۔ حکام کے مطابق ملزم نے 2009 سے 2025 کے دوران 900 سے زائد پروازیں مبینہ طور پر جعلی یا غیر مکمل اسناد کی بنیاد پر چلائیں۔
A former pilot flew commercial planes for nearly 17 years allegedly without the required license, Ontario police say. https://t.co/KVsCprvukN
— NBC News (@NBCNews) June 10, 2026
پیل ریجنل پولیس (اونٹاریو) کے مطابق تحقیقات میں یہ بات سامنے آئی ہے کہ ملزم کے پاس کمرشل پائلٹ لائسنس موجود تھا، تاہم وہ “ایئرلائن ٹرانسپورٹ پائلٹ لائسنس” حاصل نہیں کر سکا تھا، جو کسی بھی بڑے کمرشل طیارے کے کپتان کے لیے لازمی اعلیٰ ترین سرٹیفکیشن ہوتا ہے۔
پولیس نے کہا ہے کہ ابتدائی شواہد سے ظاہر ہوتا ہے کہ پائلٹ نے ایئر کینیڈا اور سول ایوی ایشن حکام کو اپنی اہلیت کے بارے میں گمراہ رکھا، جس کے ذریعے وہ برسوں تک پروازیں اڑاتا رہا۔
یہ بھی پڑھیں:بھارتی ایئرفورس کا ایک اور لڑاکا طیارہ گر کر تباہ، 2 پائلٹ ہلاک
ملزم پر ایک فردِ جرم فراڈ، دو جعلی دستاویزات استعمال کرنے، تین جعلی ٹریڈ مارک رکھنے اور ایک عوامی بدانتظامی (public mischief) کا الزام عائد کیا گیا ہے۔
ایئر کینیڈا نے اس معاملے پر ردعمل دیتے ہوئے کہا ہے کہ اس معاملے کو انتہائی سنجیدگی سے دیکھا جا رہا ہے، تاہم ان کے مطابق مسافروں کی حفاظت متاثر نہیں ہوئی کیونکہ تمام پائلٹس ہر چھ ماہ بعد لازمی ٹریننگ اور سالانہ فلائٹ چیک سے گزرتے ہیں۔
A former Air Canada pilot faces criminal charges for flying tens of thousands of passengers for nearly 17 years with a fake pilot's license, Canadian police announced. https://t.co/mW6pnJDnT0 pic.twitter.com/hRHIyJb6VQ
— CNN (@CNN) June 10, 2026
ایئرلائن کے مطابق داخلی آڈٹ کے بعد کسی اور پائلٹ میں ایسی خلاف ورزی سامنے نہیں آئی، جبکہ معاملہ سامنے آنے کے فوری بعد متعلقہ شخص کو ڈیوٹی سے ہٹا کر ٹرانسپورٹ کینیڈا کو رپورٹ کر دیا گیا تھا۔
ماہرین کے مطابق یہ کیس نہایت غیر معمولی ہے اور اس سے ایوی ایشن سسٹم میں لائسنس کی تصدیق اور نگرانی کے نظام پر سوالات اٹھے ہیں۔
