مری ایکسپریس وے پر کھجٹ کے مقام کے قریب سیاحوں کی ٹیوٹا ہائی ایس میں اچانک آگ بھڑک اٹھی جس کے نتیجے میں گاڑی روڈ کنارے نالے میں جا گری اور ٹریفک کی روانی متاثر ہو گئی۔ حادثے میں 4 افراد جاں بحق جبکہ 12 زخمی ہو گئے، جنہیں فوری طور پر قریبی اسپتالوں میں منتقل کر دیا گیا۔
ریسکیو حکام کے مطابق آگ لگنے کے بعد ہائی ایس میں شدید شعلے بلند ہوئے جس کے باعث نہ صرف گاڑی مکمل طور پر جل گئی بلکہ قریبی جنگل کے ایک حصے تک آگ پھیل گئی، جس پر قابو پانے کے لیے امدادی کارروائیاں شروع کر دی گئیں۔
یہ بھی پڑھیں:خانیوال پل حادثہ: انکوائری مکمل، 2 ریلوے افسران ملازمت سے برطرف
مقامی افراد نے بروقت کارروائی کرتے ہوئے گاڑی میں پھنسے 4 سیاحوں کو نکالا اور انہیں فوری طور پر اسپتال منتقل کیا۔ ریسکیو حکام کا کہنا ہے کہ ابتدائی معلومات کے مطابق ہائی ایس میں سیاح سوار تھے جبکہ واقعے کی وجوہات جاننے کے لیے تحقیقات جاری ہیں۔
ذرائع کے مطابق ریسکیو 1122 بروقت جائے وقوعہ پر نہ پہنچ سکی، تاہم مقامی افراد نے اپنی مدد آپ کے تحت امدادی کارروائیوں میں حصہ لیا۔
زخمیوں میں سے 5 افراد کو پمز اسپتال اسلام آباد جبکہ تین کو فاروق اسپتال منتقل کیا گیا ہے، جبکہ دیگر زخمیوں کو مری اور قریبی طبی مراکز میں طبی امداد دی جا رہی ہے۔ حکام کا کہنا ہے کہ بعض زخمیوں کی حالت تشویشناک ہے۔
ریسکیو ذرائع کے مطابق آگ لگنے کے بعد ہائی ایس بے قابو ہو کر سڑک سے پھسل کر نالے میں جا گری، جس کے باعث مری ایکسپریس وے پر ٹریفک عارضی طور پر معطل ہو گئی۔
عینی شاہدین کے مطابق گاڑی میں سیاحوں کا ایک گروپ سوار تھا اور اچانک آگ لگنے کے بعد چند ہی لمحوں میں صورتحال انتہائی خطرناک ہو گئی۔ حکام نے واقعے کی مکمل تحقیقات کا آغاز کر دیا ہے تاکہ آگ لگنے کی اصل وجہ معلوم کی جا سکے۔
