سعودی عرب کی حرمین تیز رفتار ریلوے نے حج 2026 کے دوران 11 لاکھ 60 ہزار سے زائد مسافروں کو سفری سہولت فراہم کی جس سے عازمینِ حج کی آمد و رفت کو منظم اور آسان بنانے میں اہم کردار ادا کیا گیا۔
یہ بھی پڑھیں: حج 2027 کی تیاریاں شروع، لازمی رجسٹریشن رواں ماہ شروع ہونے کا امکان
سعودی پریس ایجنسی کے مطابق حج سیزن کے دوران ریلوے نے مجموعی طور پر 5 ہزار 569 سفر مکمل کیے جو مکہ مکرمہ، مدینہ منورہ، جدہ مین اسٹیشن، شاہ عبدالعزیز بین الاقوامی ہوائی اڈہ اسٹیشن اور شاہ عبداللہ اکنامک سٹی اسٹیشن کو آپس میں ملاتے ہیں۔
حرمین ریلوے نے حج کے پورے سیزن میں شاندار عملی کارکردگی کا مظاہرہ کرتے ہوئے 98 فیصد سے زائد بروقت آمد و روانگی کا ریکارڈ برقرار رکھا۔ عروج کے دنوں میں ریلوے روزانہ 142 تک سفر چلاتی رہی، جو بڑھتی ہوئی مسافروں کی تعداد کو سنبھالنے کی اس کی صلاحیت اور مؤثر انتظامات کا مظہر ہے۔
سعودی ریلوے کے چیف ایگزیکٹو آفیسر بشار المالک نے اس کامیابی کو سعودی قیادت کی جانب سے حجاج کرام کو بہترین سہولیات فراہم کرنے کے عزم کا نتیجہ قرار دیا۔
مزید پڑھیے: مدینہ منورہ: مسجد نبویؐ کی لائبریری حج کے بعد آنے والے زائرین کے لیے علم و تحقیق کا مرکز بن گئی
انہوں نے کہا کہ وزیرِ ٹرانسپورٹ و لاجسٹک سروسز اور سعودی ریلوے کے چیئرمین صالح الجاسر کی مسلسل نگرانی اور رہنمائی کی بدولت آپریشنل منصوبے پر اعلیٰ معیار، مکمل تیاری اور مؤثر انداز میں عملدرآمد ممکن بنایا گیا۔
حرمین تیز رفتار ریلوے دنیا کے تیز ترین برقی ریل نیٹ ورکس میں شمار ہوتی ہے، جو 300 کلومیٹر فی گھنٹہ تک رفتار حاصل کرنے کی صلاحیت رکھتی ہے۔
مزید پڑھیں: مکہ میں ام القریٰ یونیورسٹی کا انقلابی ڈیجیٹل کلچرل منصوبہ، حجاج اور عمرہ زائرین کا سفر اب مزید یادگار
453 کلومیٹر طویل یہ ریلوے منصوبہ مکہ مکرمہ اور مدینہ منورہ کو پانچ بڑے اسٹیشنوں کے ذریعے آپس میں جوڑتا ہے اور سعودی عرب کے اہم ترین ٹرانسپورٹ منصوبوں میں شامل ہے۔ یہ منصوبہ حجاج اور زائرین کو تیز، محفوظ اور آرام دہ سفری سہولت فراہم کرنے میں کلیدی کردار ادا کر رہا ہے۔
