آئندہ مالی سال 27-2026 کے وفاقی بجٹ میں ملک بھر کے بڑے ترقیاتی اور ترجیحی منصوبوں کے لیے اربوں روپے مختص کرنے کی تجویز سامنے آگئی ہے۔
بجٹ دستاویزات کے مطابق قومی شاہراہ این-25 (کوئٹہ) کی تعمیر و اپ گریڈیشن کے لیے 100 ارب روپے مختص کیے گئے ہیں، جبکہ سکھرتا حیدرآباد موٹر وے منصوبے کے لیے 30 ارب روپے رکھنے کی تجویز دی گئی ہے۔
یہ بھی پڑھیں: وفاقی بجٹ 27-2026 آج پیش کیا جائے گا، کن اہم معاملات پر توجہ رہے گی؟
دستاویزات کے مطابق ایم ایل ون ریلوے منصوبے کے لیے 25 ارب روپے مختص کیے گئے ہیں، جبکہ سندھ کوسٹل ہائی وے اور مہران ہائی وے کے لیے بالترتیب 25 ارب اور 21 ارب روپے مختص کرنے کی تجاویز دی گئی پیں۔
توانائی اور آبی وسائل کے شعبے میں مہمند ڈیم ہائیڈرو پاور منصوبے کے لیے 26 ارب روپے اور داسو ہائیڈرو پاور منصوبے کے لیے 21 ارب روپے مختص کرنے کی تجویز ہے، جبکہ کراچی بلک واٹر سپلائی منصوبے کے لیے 10 ارب روپے رکھے گئے ہیں۔
مزید پڑھیں: آئندہ بجٹ میں تنخواہ دار طبقے کے لیے ٹیکس میں کمی کی تجویز زیر غور، مہتاب حیدر
تعلیم اور صحت کے شعبوں میں بھی اہم فنڈز مختص کیے گئے ہیں۔ بجٹ دستاویزات کے مطابق دانش اسکولز کی تعمیر کے لیے 22 ارب روپے جبکہ وزیراعظم نیشنل ہیلتھ پروگرام کے لیے 3 ارب روپے مختص کرنے کی تجویز دی گئی ہے۔
واضح رہے کہ وفاقی حکومت کی جانب سے وزیر خزانہ محمد اورنگزیب آج ساڑھے 17 ہزار ارب روپے مالیت کا بجٹ قومی اسمبلی میں پیش کریں گے۔
