پاکستان فٹبال کے لیے ایک اہم پیشرفت سامنے آئی ہے، جہاں قومی فٹبال ٹیم کو افتتاحی فیفا آسیان کپ میں شرکت کی دعوت دی گئی ہے۔ میڈیا رپورٹس کے مطابق پاکستان فٹبال فیڈریشن نے ایونٹ میں قومی ٹیم کی شرکت کی تصدیق کردی ہے۔
میڈیا رپورٹس کے مطابق فیفا نے پاکستان کو افتتاحی فیفا آسیان کپ میں شرکت کی باضابطہ دعوت دی ہے، جسے پاکستان فٹبال کے لیے ایک تاریخی موقع قرار دیا جا رہا ہے۔
یہ بھی پڑھیں:فیفا ورلڈ کپ 2026: کن اسٹیڈیمز میں کتنے شائقین کی گنجائش موجود ہے؟
رپورٹس کے مطابق پاکستان فٹبال فیڈریشن نے قومی ٹیم کی ایونٹ میں شرکت کی تصدیق کرتے ہوئے کہا ہے کہ ٹیم پہلی بار فیفا کے ایسے ٹورنامنٹ میں حصہ لے گی جو ورلڈ کپ یا ایشین کوالیفائرز سے الگ ہوگا۔
افتتاحی فیفا آسیان کپ رواں سال 21 ستمبر سے 6 اکتوبر تک انڈونیشیا میں کھیلا جائے گا۔ ایونٹ میں پاکستان کو ڈویژن ون میں شامل کیا گیا ہے، جہاں قومی ٹیم کو بھارت، میزبان انڈونیشیا، ملائیشیا، فلپائن، سنگاپور اور تھائی لینڈ جیسی ٹیموں کا سامنا ہوگا۔
میڈیا رپورٹس کے مطابق پاکستان کو ایونٹ میں شامل کیے جانے میں پاکستان فٹبال فیڈریشن کے حکام کے فیفا کے ساتھ روابط اور سفارتی کوششوں نے اہم کردار ادا کیا۔
فٹبال ماہرین کا کہنا ہے کہ فیفا آسیان کپ میں شرکت پاکستان کے لیے عالمی سطح پر اپنی صلاحیتوں کے اظہار، کھلاڑیوں کو بین الاقوامی تجربہ فراہم کرنے اور قومی فٹبال کے فروغ کا ایک اہم موقع ثابت ہوسکتی ہے۔
