دنیا کے بلند ترین پولو میدان شندور میں کھیلے گئے شندور پولو فیسٹیول کے فائنل میں گلگت بلتستان نے دلچسپ اور کانٹے دار مقابلے کے بعد چترال کو 5 کے مقابلے میں 6 گول سے شکست دے کر ٹائٹل اپنے نام کرلیا۔
فائنل میچ کا آغاز اختتامی تقریب کے مہمان خصوصی کور کمانڈر الیون کور لیفٹیننٹ جنرل عمر احمد بخاری نے گیند پھینک کر کیا۔
میچ کے آغاز ہی سے دونوں ٹیموں کے درمیان سنسنی خیز مقابلہ دیکھنے میں آیا اور شائقین کی دلچسپی آخری لمحات تک برقرار رہی۔
شندور پولو فیسٹیول کا فائنل گلگت بلتستان کی ٹیم نے جیت لیا۔
فائنل میچ میں گلگت بلتستان کی ٹیم نے چترال کو 6 گول کے مقابلے میں 5 گول سے شکست دی۔چترال کی ٹیم کو 13 سال بعد شکست کا سامنا کرنا پڑا pic.twitter.com/I4JnLmx6I3
— Muhammad Faheem (@MeFaheem) June 13, 2026
میچ کے پہلے ہاف میں چترال کی ٹیم نے عمدہ کھیل کا مظاہرہ کرتے ہوئے 5 گول اسکور کیے، جبکہ گلگت بلتستان کی ٹیم نے 4 گول کر کے مقابلہ سخت رکھا۔
دوسرے ہاف میں گلگت بلتستان کے کھلاڑیوں نے شاندار کم بیک کرتے ہوئے ایک گول کی برتری حاصل کی اور بالآخر 5 کے مقابلے میں 6 گول سے کامیابی سمیٹ لی۔
اس شکست کے ساتھ ہی چترال کی ٹیم کا 13 سالہ ناقابلِ شکست رہنے کا سلسلہ بھی ختم ہو گیا۔
فتح کے بعد گلگت بلتستان کے کھلاڑیوں نے پولو گراؤنڈ میں بھرپور جشن منایا اور شائقین نے بھی اپنی ٹیم کی کامیابی پر خوشی کا اظہار کیا۔
شندور پولو فیسٹیول پاک فوج، خیبرپختونخوا کلچر اینڈ ٹورازم اتھارٹی، چترال اسکاؤٹس اور ضلعی انتظامیہ کے باہمی تعاون سے منعقد کیا گیا تھا۔
فائنل میچ دیکھنے کے لیے آئی جی ایف سی میجر جنرل راؤ عمران، کمانڈنٹ چترال اسکاؤٹس کرنل ارسلان، کمشنر ملاکنڈ مسعود احمد، سیکریٹری سیاحت خیبرپختونخوا سعادت حسن، ڈی جی ٹورازم اتھارٹی شاہد خان اور ڈپٹی کمشنر اپر چترال محمد عمران بھی موجود تھے۔
شندور پولو فیسٹیول کے فائنل کو دیکھنے کے لیے لاکھوں کی تعداد میں ملکی اور غیر ملکی سیاح شندور پہنچے، جنہوں نے روایتی اور تاریخی کھیل کے اس شاندار مقابلے سے بھرپور لطف اٹھایا۔
