علی بابا ڈاٹ کام کی خدمات پاکستانی ایس ایم ایز کو ڈیجیٹل تجارت کے ذریعے عالمی منڈیوں میں مؤثر انداز سے شامل ہونے میں مدد فراہم کریں گی، جس سے برآمدات میں اضافہ اور نئے معاشی مواقع پیدا ہوں گے۔
وزیراعظم کے معاونِ خصوصی برائے صنعت و پیداوار ہارون اختر خان نے پیر کو علی بابا ڈاٹ کام کے ایک اعلیٰ سطحی وفد کے ساتھ اہم اجلاس کی صدارت کی۔
اجلاس میں پاکستان کی ڈیجیٹل معیشت کو مضبوط بنانے، صنعتی ترقی کو فروغ دینے اور چھوٹے و درمیانے درجے کے کاروباری اداروں کی برآمدی صلاحیت بڑھانے کے امکانات پر تبادلہ خیال کیا گیا۔
یہ بھی پڑھیں: پاکستان اور علی بابا گروپ کے درمیان اہم معاہدے، ڈیجیٹل تعاون کو فروغ دینے پر اتفاق
اجلاس میں اسمیڈا کے تعاون سے ’ڈیجی ایس ایم ای پاکستان‘ منصوبے پر عمل درآمد، صنعتی ترقی اور پاکستانی مصنوعات کی عالمی آن لائن منڈیوں تک رسائی کے فروغ سمیت مختلف امور زیرِ غور آئے۔
علی بابا ڈاٹ کام کے وفد نے اجلاس کے دوران مصنوعی ذہانت پر مبنی جدید حل پیش کیے، جن کا مقصد پاکستانی ایس ایم ایز کی کاروباری استعداد میں اضافہ اور انہیں عالمی تجارتی مواقع سے مؤثر انداز میں فائدہ اٹھانے کے قابل بنانا ہے۔
اس موقع پر ہارون اختر خان نے کہا کہ وزیراعظم محمد شہباز شریف کے حالیہ دورۂ چین اور علی بابا گروپ کے ساتھ طے پانے والی مفاہمتی یادداشتیں پاکستان کی اقتصادی ترقی کے لیے اہم سنگِ میل ہیں۔
معاون خصوصی ہارون اختر خان کی زیر صدارت علی بابا گروپ کے وفد کے ساتھ اعلیٰ سطحی اجلاس
پاکستان کی ڈیجیٹل معیشت، صنعتی ترقی اور چھوٹے و درمیانے کاروباری اداروں کی برآمدات بڑھانے کے لیے تعاون پر تبادلہ خیال pic.twitter.com/fzZB4TKJ4v
— M/o Industries & Production (@Pak_MoIP) June 15, 2026
انہوں نے کہا کہ علی بابا ڈاٹ کام کی خدمات پاکستانی ایس ایم ایز کو ڈیجیٹل تجارت کے ذریعے عالمی منڈیوں میں مؤثر انداز سے شامل ہونے میں مدد فراہم کریں گی، جس سے برآمدات میں اضافہ اور نئے معاشی مواقع پیدا ہوں گے۔
علی بابا ڈاٹ کام کے وفد نے اس موقع پر اس اعتماد کا اظہار کیا کہ پاکستان کی معیاری مصنوعات عالمی خریداروں تک رسائی کے لیے کمپنی کے ڈیجیٹل پلیٹ فارم سے بھرپور فائدہ اٹھا سکتی ہیں۔
وفد نے کہا کہ مصنوعی ذہانت پر مبنی جدید میچنگ سلوشنز پاکستانی فروخت کنندگان کو بین الاقوامی طلب سے جوڑنے میں اہم کردار ادا کریں گے۔
مزید پڑھیں: ای کامرس سیکٹر میں بڑی سرمایہ کاری، علی بابا کی کمپنی کو گرین سگنل
وفد نے مقامی مائیکرو، اسمال اور میڈیم انٹرپرائزز کی برآمدی نمو کے لیے خصوصی ڈیجیٹل خدمات اور معاونت فراہم کرنے کے عزم کا اعادہ بھی کیا۔
اس سلسلے میں پاکستانی ایس ایم ایز کو آن لائن برآمدات، ڈیجیٹل تجارت اور ای کامرس کے بہترین طریقہ کار سے آگاہ کرنے کے لیے خصوصی تربیتی سیشنز کا انعقاد بھی کیا جائے گا۔
ہارون اختر خان نے اسمیڈا کو ہدایت کی کہ وہ علی بابا ڈاٹ کام کے ساتھ قریبی تعاون کو یقینی بنائے تاکہ چھوٹے اور درمیانے درجے کے کاروباری ادارے عالمی ای کامرس میں دستیاب مواقع سے بھرپور استفادہ کر سکیں۔
اجلاس کے اختتام پر پاکستان کے ایس ایم ای شعبے کی ڈیجیٹل تبدیلی اور بین الاقوامی سطح پر توسیع کے لیے باہمی تعاون مزید مضبوط بنانے کے عزم کا اظہار کیا گیا۔
