امریکی وفاقی تحقیقاتی ادارے (ایف بی آئی) نے مائیکروسافٹ 365 سروسز استعمال کرنے والے صارفین، جن میں آؤٹ لک، ٹیمز اور ون ڈرائیو شامل ہیں، کو ایک بڑھتے ہوئے سائبر خطرے سے خبردار کیا ہے۔
یہ بھی پڑھیں: وکلا اور اکاؤنٹنٹس کی ملازمتیں شدید خطرے میں: مائیکروسافٹ اے آئی کے سربراہ کا انتباہ
ایف بی آئی کے مطابق ایک نئے فِشنگ مہم کے ذریعے ہیکرز ایسے حملے کر رہے ہیں جو ملٹی فیکٹر آتھنٹیکیشن کو بھی بائی پاس کرنے کی صلاحیت رکھتے ہیں جس سے صارفین کے اکاؤنٹس زیادہ غیر محفوظ ہو گئے ہیں۔
رپورٹس کے مطابق سائبر مجرم ایک ہیکنگ پلیٹ فارم ’کالی 365‘ استعمال کر رہے ہیں جو او آتھ آتھنٹیکیشن ٹوکنز چوری کرنے کی صلاحیت رکھتا ہے۔ ان ٹوکنز کے ذریعے حملہ آور صارف کے پاسورڈ کے بغیر ہی ان کے اکاؤنٹس تک رسائی حاصل کر سکتے ہیں۔
یہ فِشنگ حملے عام طور پر ایسے ای میلز کے ذریعے کیے جاتے ہیں جو بظاہر مائیکروسافٹ کی آفیشل ای میلز لگتی ہیں۔ صارفین کو ایک ’ڈیوائس ویریفکیشن کوڈ‘ درج کرنے کے لیے کہا جاتا ہے اور جیسے ہی یہ کوڈ درج کیا جاتا ہے، ہیکرز اس ایکسس ٹوکن کو حاصل کر لیتے ہیں اور آؤٹ لک، ٹیمز اور ون ڈرائیو جیسے اکاؤنٹس تک رسائی حاصل کر لیتے ہیں۔
مزید پڑھیے: مائیکروسافٹ کا مصنوعی ذہانت کے شعبے میں بڑا قدم، انتھروپک ٹیکنالوجی کو کوپائلٹ میں شامل کرنے کا اعلان
ایف بی آئی نے خبردار کیا ہے کہ یہ نیا پلیٹ فارم کم مہارت رکھنے والے ہیکرز کے لیے بھی جدید سہولیات فراہم کرتا ہے جن میں اے آئی پر مبنی فِشنگ ٹیمپلیٹس، خودکار حملے اور متاثرہ افراد کو ٹریک کرنے والے ڈیش بورڈز شامل ہیں۔
سائبر سیکیورٹی ماہرین کے مطابق یہ سروس ٹیلیگرام چینلز کے ذریعے اپریل 2026 سے فعال طور پر فروغ دی جا رہی ہے اور اس تک رسائی کی قیمت تقریباً 250 ڈالر ماہانہ بتائی جاتی ہے۔
مزید پڑھیں: مائیکروسافٹ نے مغربی کنارے سے متعلق اسرائیلی اصطلاحات ختم کرکے فلسطینی جغرافیائی نام شامل کر دیے
ایف بی آئی نے صارفین کو ہدایت کی ہے کہ وہ غیر معروف لنکس پر کلک نہ کریں اور کسی بھی غیر مطلوبہ ویریفکیشن کوڈ یا لاگ اِن درخواست کو ہرگز استعمال نہ کریں۔ متاثرہ افراد کو فوری طور پر انٹرنیٹ کرائم کمپلینٹ سینٹر (آئی سی 3) کو رپورٹ کرنے کا مشورہ دیا گیا ہے۔
