بھارتی سرپرستی میں کام کرنے والے فتنہ الہندوستان سے وابستہ دہشتگردوں کی جانب سے بلوچستان کے مختلف علاقوں میں ایمبولینسز، ادویات سے لدی گاڑیاں اور طبی سامان چھیننے کے متعدد واقعات سامنے آئے ہیں۔
سرکاری ذرائع کے مطابق ان کارروائیوں نے پہلے ہی محدود طبی سہولیات کے حامل صوبے میں عام بلوچ عوام، بالخصوص دور دراز علاقوں کے مکینوں کے لیے علاج و معالجے کے مسائل میں مزید اضافہ کر دیا ہے۔
سرکاری دستاویزات اور حکام کے مطابق فتنہ الہندوستان سے وابستہ دہشتگرد عناصر بلوچستان میں عوامی و نجی ملکیت کی ایمبولینسز اور ادویات سے لدی گاڑیاں چھین کر نہ صرف ہنگامی طبی امداد کے نظام کو متاثر کر رہے ہیں بلکہ عام بلوچ آبادی کو صحت کی بنیادی سہولیات سے بھی محروم کر رہے ہیں۔ حکام ان کارروائیوں کو عام بلوچ عوام کے خلاف ’ہیلتھ جینوسائیڈ‘ قرار دے رہے ہیں۔
یہ بھی پڑھیں:لاپتا افراد کی آڑ میں کئی نوجوان دہشتگردی میں ملوث، بی ایل اے کا مکرو چہرہ بے نقاب
حکام کے مطابق بلوچستان پہلے ہی اسپتالوں، کلینکس، طبی مراکز، پیرامیڈیکل عملے اور ایمبولینسوں کی کمی کا شکار ہے۔ صوبے کے وسیع جغرافیائی پھیلاؤ کے باعث دور دراز علاقوں میں کسی صحت مرکز تک پہنچنے کا اوسط فاصلہ تقریباً 32 کلومیٹر ہے، جس کی وجہ سے ایمبولینسز ہزاروں افراد کے لیے زندگی بچانے کا واحد ذریعہ سمجھی جاتی ہیں۔
دستاویزات کے مطابق 11 اگست 2025 کو مستونگ کے علاقے گورگینہ سے ایک ایمبولینس چھینی گئی۔ 21 اگست 2025 کو کلی میر خان، خالق آباد، قلات سے محکمہ صحت کی ٹویوٹا ہائی ایس سنگل کیبن ایمبولینس بھی دہشتگردوں کے قبضے میں چلی گئی۔
اسی طرح 31 جنوری 2026 کو ڈی ایچ کیو مستونگ کی سفید رنگ کی ہائی ایس ایمبولینس، 19 مارچ 2026 کو شیخ واصل پانی پائی سے ایک ایمبولینس اور اسی روز کرداپ، مستونگ سے پولیس ایمبولینس چھین لی گئی۔ 7 اپریل 2026 کو چپر گھاٹ، قلات کے قریب ایک نجی ایمبولینس بھی مبینہ طور پر دہشتگردوں نے اپنے قبضے میں لے لی۔
رپورٹ کے مطابق 4 مئی 2026 کو گدان ہوٹل، قلات کے علاقے سے ادویات سے بھری ایک نجی سوزوکی پک اپ، 26 مئی 2026 کو ڈی ایچ کیو خاران کی ایمبولینس، 29 مئی 2026 کو مغل کنڈ، خالق آباد سے بی ایچ یو خالق آباد کی ایمبولینس اور 30 مئی 2026 کو کھڈکوچہ، مستونگ کے گرو علاقے سے ادویات پر مشتمل ایک کنٹینر بھی چھین لیا گیا۔
یہ بھی پڑھیں:انسانی حقوق یا پروپیگنڈا؟ بھارت اور بی ایل اے کے متضاد بیانیوں کا پول کُھل گیا
سرکاری ذرائع کا کہنا ہے کہ فتنہ الہندوستان کے دہشتگرد اس سے قبل مزدوروں، ترقیاتی منصوبوں پر کام کرنے والے افراد اور غیر ملکی ماہرین کو نشانہ بناتے رہے ہیں، تاہم اب ان کی کارروائیوں کا رخ صحت کے شعبے کی جانب بھی ہو گیا ہے۔ حکام کے مطابق ان اقدامات سے سب سے زیادہ نقصان ان غریب اور پسماندہ بلوچ خاندانوں کو پہنچ رہا ہے جو علاج اور ہنگامی طبی امداد کے لیے انہی وسائل پر انحصار کرتے ہیں۔
بیان میں کہا گیا ہے کہ مختلف پسماندہ علاقوں سے 9 ایمبولینسوں اور ادویات سے لدے کنٹینر و گاڑیوں کا چھین لیا جانا اس بات کا ثبوت ہے کہ ان کارروائیوں کا ہدف عام بلوچ عوام کی فلاح نہیں بلکہ خطے میں خوف، عدم استحکام اور مشکلات پیدا کرنا ہے۔ حکام کے مطابق عام شہریوں کی جان بچانے کے لیے مختص طبی وسائل کو نشانہ بنانا ایک سنگین عمل ہے جس کے اثرات براہِ راست بلوچستان کے عام لوگوں پر مرتب ہو رہے ہیں۔
