وزیراعلیٰ پنجاب مریم نواز شریف کی قیادت میں پنجاب حکومت نے مالی سال 2026-27 کا تقریباً 5.9 ٹریلین روپے کا عوام دوست بجٹ پیش کیا ہے، جس میں صحت، تعلیم اور ترقی کے متعدد نئے اور جاری پروجیکٹس شامل ہیں۔ ان میں نواز شریف اور مریم نواز کے نام سے منسلک اہم اسکیمیں نمایاں ہیں۔
یہ بھی پڑھیں:خشک سالی اور صحرائی پھیلاؤ سے نمٹنے کے لیے جدید ٹیکنالوجی کا استعمال ناگزیر ہے، مریم نواز شریف
اس بجٹ میں نواز شریف کے نام سے 5 نئے پروجیکٹس اور وزیراعلیٰ پنجاب مریم نواز کے نام سے 2 نئے پروجیکٹس شروع کرنے کی تجویز ہے، جبکہ کلثوم نواز کے نام سے بھی ایک پروجیکٹ ڈی جی خان میں شروع کرنے کی تجویز اس بجٹ میں شامل ہے۔
صحت کے شعبے میں نواز شریف میڈیکل ڈسٹرکٹ لاہور کے قیام کے لیے 169 ارب روپے مختص کیے گئے ہیں، جبکہ نواز شریف انسٹی ٹیوٹ آف کینسر ٹریٹمنٹ اینڈ ریسرچ کے لیے 20 ارب روپے کی فنڈنگ جاری رکھی گئی ہے۔ اس بجٹ میں نواز شریف انجینئرنگ اینڈ ٹیکنالوجی یونیورسٹی قصور کا قیام عمل میں لایا جائے گا، اس کے لیے 34 ارب روپے سے زائد کی رقم تجویز کی گئی ہے۔ نواز شریف انسٹی ٹیوٹ آف کارڈیالوجی سرگودھا میں جدید آلات کی فراہمی کے لیے 14 ارب روپے سے زائد کی رقم تجویز کی گئی ہے۔ اس کے علاوہ ڈی جی خان میں کلثوم نواز کینسر ہسپتال سمیت دیگر صحت کے پروجیکٹس بھی بجٹ کا حصہ ہیں۔
یہ بھی پڑھیں:پاکستان نے ہمیشہ کشمیریوں کی جدوجہد کو اپنی جدوجہد سمجھا، نواز شریف کا آزاد کشمیر کی صورتحال پر اظہار تشویش
تعلیم اور اکیڈمک ڈویلپمنٹ کے میدان میں مریم نواز شریف سینٹر آف اکیڈمک لیڈرشپ، نواز شریف سینٹر آف ایکسیلنس اور STEAM لیبارٹری پروگرامز کے لیے مجموعی طور پر 40 ارب روپے مختص کیے گئے ہیں۔ اس بجٹ میں مریم نواز سپورٹس سٹی لاہور بھی بنایا جائے گا، جس کے لیے 16 ارب روپے سے زائد کی رقم تجویز کی گئی ہے۔
ان پروجیکٹس کا مقصد تعلیمی معیار کو بہتر بنانا، قیادت کی تربیت اور سائنس، ٹیکنالوجی، انجینئرنگ، آرٹس اور میتھمیٹکس پر مبنی جدید لیبارٹریز قائم کرنا ہے۔
یہ پروجیکٹس پنجاب کے بجٹ کے ترقیاتی پروگرام کا اہم حصہ ہیں۔ بجٹ بغیر کسی نئے ٹیکس کے پیش کیا گیا ہے اور ہزاروں جاری و نئے اسکیموں پر عملدرآمد کا اہتمام کیا گیا ہے۔
