لائسنس یافتہ موبائل فون اور ٹیلی کمیونیکیشن کمپنیاں نجی و سرکاری املاک پر ٹاور نصب اور آپٹیکل فائبر بچھا سکیں گی، جبکہ رکاوٹ ڈالنے والوں پر بھاری جرمانے کی تجویز دی گئی ہے۔
قومی اسمبلی نے پاکستان ٹیلی کمیونیکیشن تنظیم نو ترمیمی بل منظور کرلیا ہے، جسے مزید منظوری کے لیے سینیٹ میں پیش کیا جائے گا۔
ترمیمی بل کے مطابق نجی جائیدادوں کے مالکان اور سرکاری ادارے ٹیلی کمیونیکیشن انفرااسٹرکچر کے قیام کے لیے جگہ فراہم کرنے کے پابند ہوں گے۔
میڈیا رپورٹ کے مطابق بل میں تجویز کیا گیا ہے کہ موبائل فون یا ٹیلی کمیونیکیشن کمپنیوں کو آپٹیکل فائبر بچھانے یا ٹاور نصب کرنے کے لیے جگہ فراہم نہ کرنے والے نجی گھر کے مالک، کرائے دار یا عوامی و نجی ادارے پر 5 کروڑ روپے تک جرمانہ عائد کیا جا سکے گا۔
یہ بھی پڑھیں:پاکستان میں 5 جی کی تیاری: جاز اور زونگ نے سینکڑوں ہم آہنگ موبائل فونز کی فہرست جاری کردی
بل کے تحت ٹیلی کمیونیکیشن نیٹ ورک کی توسیع اور جدید مواصلاتی سہولیات کی فراہمی کے لیے کمپنیوں کو انفرااسٹرکچر قائم کرنے میں آسانی فراہم کی جائے گی۔
