سپریم کورٹ آف پاکستان نے اپنے ملازمین کے لیے یوٹیلیٹی الاؤنس میں 100 فیصد اضافے کی منظوری دے دی ہے، جس کا اطلاق یکم جولائی 2026 سے ہوگا۔ اضافے کی منظوری چیف جسٹس آف پاکستان نے دی۔
تفصیلات کے مطابق یوٹیلیٹی الاؤنس میں اضافے کے بعد گریڈ 1 سے 6 تک کے ملازمین کا الاؤنس 6 ہزار روپے سے بڑھا کر 12 ہزار روپے کر دیا گیا ہے، جبکہ گریڈ 7 سے 10 تک کے ملازمین کو اب 8 ہزار کے بجائے 16 ہزار روپے یوٹیلیٹی الاؤنس ملے گا۔
گریڈ 11 سے 15 تک کے ملازمین کا الاؤنس 10 ہزار روپے سے بڑھا کر 20 ہزار روپے، گریڈ 16 کے افسران کا الاؤنس 12 ہزار سے بڑھا کر 24 ہزار روپے اور گریڈ 17 کے افسران کا یوٹیلیٹی الاؤنس 15 ہزار سے بڑھا کر 30 ہزار روپے مقرر کر دیا گیا ہے۔
اسی طرح گریڈ 18 کے افسران کا الاؤنس 18 ہزار سے بڑھ کر 36 ہزار روپے، گریڈ 19 کے افسران کا 21 ہزار سے بڑھا کر 42 ہزار روپے اور گریڈ 20 کے افسران کا الاؤنس 24 ہزار سے بڑھا کر 48 ہزار روپے کر دیا گیا ہے۔
یہ بھی پڑھیں:سپریم کورٹ کا غیر قانونی بے دخلی کے مقدمات پر اہم فیصلہ، 60 روز میں نمٹانے کی ہدایت
گریڈ 21 اور اس سے اوپر کے افسران کے لیے یوٹیلیٹی الاؤنس 30 ہزار روپے سے بڑھا کر 60 ہزار روپے مقرر کیا گیا ہے۔
ذرائع کے مطابق یوٹیلیٹی الاؤنس میں گیس اور بجلی کے اخراجات شامل ہوں گے، جبکہ اضافی مالی اخراجات مالی سال 2026-27 کے منظور شدہ بجٹ سے پورے کیے جائیں گے۔
