برطانیہ کے علاقے کیمبرج شائر میں ایک چڑیا گھر کے مگرمچھ کے باڑے میں 3 سالہ بچے کے شدید زخمی ہونے کے واقعے کے بعد گرفتار کیے گئے ایک شخص کو ضمانت پر رہا کر دیا گیا ہے۔
کیمبرج شائر پولیس کے مطابق مذکورہ شخص کو بچے کو مگرمچھ کے باڑے میں پھینکنے کے الزام میں اقدام قتل کے شبے میں گرفتار کیا گیا تھا، تاہم اسے طبی حالت کے باعث تفتیش کے لیے نااہل قرار دیا گیا اور بعد ازاں ضمانت پر رہا کردیا گیا۔
یہ بھی پڑھیں: مگرمچھ کا حملہ: 57 سالہ خاتون دریا میں لاپتا، ویڈیو وائرل
واقعہ جمعرات کے روز ہنٹنگڈن کے قریب جانسنز آف اولڈ ہرسٹ چڑیا گھر میں پیش آیا، جہاں مگرمچھ کے حملے سے زخمی ہونے والا بچہ اب بھی اسپتال میں انتہائی نگہداشت میں زیر علاج ہے، تاہم اس کی حالت تشویشناک لیکن مستحکم بتائی جا رہی ہے۔
چڑیا گھر کے عملے نے فوری کارروائی کرتے ہوئے بچے کو مگرمچھ کے باڑے سے باہر نکالا۔ بچے کو موقع پر ابتدائی طبی امداد دی گئی جس کے بعد اسے کیمبرج کے ایڈن بروکس اسپتال منتقل کر دیا گیا۔
یہ بھی پڑھیں: ہاتھیوں سے بچنے کے لیے دریا میں کودنے والا شخص مگرمچھ کا نوالہ بن گیا
جانسنز آف اولڈ ہرسٹ انتظامیہ نے اپنے بیان میں کہا کہ ان کی دعائیں بچے اور اس کے اہل خانہ کے ساتھ ہیں، جبکہ احتراماً واقعے کی جگہ کو عارضی طور پر بند کر دیا گیا ہے۔
پولیس کے مطابق ابتدائی تحقیقات میں یہ بات سامنے آئی ہے کہ گرفتار شخص اور زخمی بچے کے درمیان کسی قسم کا تعلق معلوم نہیں ہو سکا۔ پولیس واقعے کے وقت چڑیا گھر میں موجود افراد سے بھی معلومات حاصل کررہی ہے۔
یہ بھی پڑھیں: ارجنٹائن میں 7 کروڑ سال پرانا دیوقامت ‘مگرمچھوں کا بُل ڈاگ’ دریافت
ہنٹنگڈن سے رکن پارلیمنٹ بین اوبیز جیکٹی نے عوام سے اپیل کی ہے کہ وہ سوشل میڈیا پر قیاس آرائیوں سے گریز کریں، جبکہ پولیس اس واقعے کو ایک نہایت سنگین واقعے کے طور پر دیکھ رہی ہے۔
جانسنز آف اولڈ ہرسٹ ایک خاندانی فارم ہے، جہاں قصائی کی دکان، فارم شاپ، چائے خانہ، اسٹیک ہاؤس اور چڑیا گھر بھی موجود ہے۔ یہاں مگرمچھ پہلی مرتبہ 2006 میں لائے گئے تھے اور انہیں ایک تبدیل شدہ مویشیوں کے باڑے میں رکھا جاتا ہے، جہاں بلند حفاظتی راستوں سے زائرین انہیں دیکھ سکتے ہیں۔
