میٹ رینشا کی ناقابل شکست 89 رنز کی بہترین اننگز اور آل راؤنڈ کارکردگی کی بدولت آسٹریلیا نے دوسرے ٹی 20 میچ میں بنگلہ دیش کو 7 رنز سے شکست دے کر 3 میچوں کی سیریز میں 0-2 کی فیصلہ کن برتری حاصل کر لی۔
یہ بھی پڑھیں: بنگلہ دیش نے دوسرے ون ڈے میں بھی شکست دے کر پہلی بار آسٹریلیا کے خلاف سیریز جیت لی
آسٹریلیا نے ٹاس جیت کر پہلے بیٹنگ کرتے ہوئے مقررہ 20 اوورز میں 5 وکٹوں کے نقصان پر 196 رنز بنائے، جو ٹی ٹوئنٹی کرکٹ میں بنگلہ دیش کے خلاف اس کا اب تک کا سب سے بڑا اسکور ہے۔
کپتان مچل مارش (20) اور جوش انگلس (11) نے ٹیم کو اچھا آغاز فراہم کیا تاہم بنگلہ دیشی بولرز نے ابتدائی اوورز میں دونوں کو پویلین بھیج کر آسٹریلیا کو 44 رنز پر تین وکٹوں کے نقصان سے دوچار کر دیا۔
اس موقعے پر میٹ رینشا اور ٹم ڈیوڈ نے چوتھی وکٹ کے لیے صرف 50 گیندوں پر 97 رنز کی جارحانہ شراکت قائم کر کے ٹیم کو مضبوط پوزیشن میں پہنچا دیا۔ ٹم ڈیوڈ نے 26 گیندوں پر 45 رنز بنائے جس میں 2 چوکے اور 4 چھکے شامل تھے جبکہ رینشا نے 52 گیندوں پر ناقابلِ شکست 89 رنز کی اننگز کھیلی جس میں 4 چوکے اور 5 چھکے شامل تھے۔
مزید پڑھیے: انڈر 18 ہاکی ایشیا کپ : پاکستان نے بنگلہ دیش کو ہرا کر سیمی فائنل کے لیے کوالیفائی کرلیا
197 رنز کے ہدف کے تعاقب میں بنگلہ دیش نے جارحانہ آغاز کیا اور پہلے 6 اوورز میں 72 رنز بنا کر آسٹریلیا کے خلاف پاور پلے کا اپنا سب سے بڑا اسکور قائم کیا۔ تنزید حسن نے صرف 15 گیندوں پر 30 رنز کی برق رفتار اننگز کھیلی، تاہم میٹ رینشا نے ان کا کیچ خود پکڑ کر اہم کامیابی حاصل کی۔
سیف حسن نے 33 گیندوں پر 42 رنز بنا کر مزاحمت کی لیکن آسٹریلوی اسپنرز نے درمیانی اوورز میں رنز کی رفتار کم کر دی۔ ایرن ہارڈی نے 2 وکٹیں حاصل کیں جبکہ رینشا نے بھی ایک وکٹ لے کر آل راؤنڈ کارکردگی کا مظاہرہ کیا۔
مزید پڑھیں: پاکستان نے آسٹریلیا کو تیسرے ون ڈے میں 4وکٹوں سے شکست دے کر سیریز اپنے نام کرلی
بنگلہ دیش کی ٹیم مقررہ 20 اوورز میں 6 وکٹوں کے نقصان پر 189 رنز ہی بنا سکی یوں آسٹریلیا نے سنسنی خیز مقابلہ 7 رنز سے جیت کر سیریز اپنے نام کر لی۔
ٹی 20 سیریز کا تیسرا اور آخری میچ اتوار کو چٹوگرام میں ہی کھیلا جائے گا۔
