دفتر خارجہ نے تصدیق کی ہے کہ ایران کے صدر مسعود پزشکیان کل پاکستان کا دورہ کریں گے۔
ترجمان دفتر خارجہ کے مطابق وزیراعظم شہباز شریف کی دعوت پر اسلامی جمہوریہ ایران کے صدر ڈاکٹر مسعود پزشکیان 23 جون 2026 (بروز منگل) کو پاکستان کا سرکاری دورہ کریں گے۔ ایرانی صدر کے ہمراہ وزرا اور اعلیٰ حکام پر مشتمل ایک اعلیٰ سطحی وفد بھی پاکستان آئے گا۔
یہ بھی پڑھیں: ایرانی صدر مسعود پزیشکیان کل پاکستان کا دورہ کریں گے
دورے کے دوران صدر مسعود پزشکیان، صدر پاکستان سے ملاقات کریں گے جبکہ وزیراعظم شہباز شریف کے ساتھ وفود کی سطح پر مذاکرات بھی ہوں گے۔ چیئرمین سینیٹ، اسپیکر قومی اسمبلی اور نائب وزیراعظم و وزیر خارجہ بھی ایرانی صدر سے ملاقات کریں گے۔
دورے کے دوران دونوں ممالک دوطرفہ تعلقات کے تمام پہلوؤں کا جائزہ لیں گے اور تجارت، توانائی، سرحدی سلامتی، عوامی روابط اور علاقائی روابط سمیت مختلف شعبوں میں تعاون کو مزید فروغ دینے کے نئے امکانات پر غور کریں گے۔
یہ دورہ اسلام آباد مفاہمتی یادداشت پر دستخط کے بعد جاری سفارتی روابط اور باہمی دلچسپی کے علاقائی و بین الاقوامی امور پر تبادلہ خیال کا بھی اہم موقع فراہم کرے گا۔
یہ بھی پڑھیں: تاریخی دستاویز ’اسلام آباد مفاہمتی یادداشت‘ پاک ایران تعلقات میں ایک اہم سنگ میل ہے، ایرانی صدر مسعود پزیشیکیان
ایرانی صدر کا دورہ پاکستان اور ایران کے درمیان تاریخی، ثقافتی اور برادرانہ تعلقات کو مزید مضبوط بنانے کے مشترکہ عزم کی عکاسی کرتا ہے اور خطے میں امن، استحکام اور پائیدار ترقی کے مشترکہ مقصد کو اجاگر کرتا ہے۔
یاد رہے کہ ایران کے صدر کی حیثیت سے ڈاکٹر مسعود پزشکیان کا یہ پاکستان کا دوسرا دورہ ہوگا۔
