سانحہ گل پلازہ کیس کے چالان میں پولیس نے صدر گل پلازہ تنویر پاستا اور دیگر کو آتشزدگی کا ذمہ دار قراردے دیا ہے، جبکہ محکمہ پراسیکیوشن نے چالان اعتراض لگا کر واپس کردیا۔
محکمہ پراسیکیوشن ذرائع کے مطابق پولیس نے گل پلازہ آتشزدگی کے ذمہ داران کا تعین کردیا ہے، چالان میں ملزمان تنویر پاستا یونین صدر، عمار اسماعیل نائب صدر، امین جنرل سیکریٹری، محمدرمضان جوائیٹ سیکریٹری کو ذمہ دار قرار دیا گیا ہے۔
یہ بھی پڑھیں: سانحہ گل پلازہ: جوڈیشل کمیشن کے سامنے متاثرین کے بیانات، ریلیف پیکج کا اعلان
پولیس کا پیش کردہ چالان اعتراضات لگا کر واپس کردیا گیا ہے۔ پراسیکیوشن نے پولیس کی تفتیش کو ناکافی قرار دے دیا، پراسیکیوشن نے چالان کے ساتھ انکوائری کمیشن کی رپورٹ منسلک کرنے کی بھی ہدایت کی ہے۔
پراسیکیوشن ذرائع کے مطابق تفتیشی افسر کو کہا گیا ہے کہ گل پلازہ کے ارد گرد کی بلڈنگ کی سی سی ٹی وی فوٹیج بھی شامل کی جائیں۔
پراسیکیوشن کا مؤقف ہے کہ پولیس نے پھولوں کی دکان کےاردگرد سے کسی چشم دید گواہ کو ڈھونڈنے کی کوشش نہیں کی، پولیس نے 4 صفحات پر مشتمل چالان اور سینکڑوں دیگر دستاویزات پراسیکیوشن کو فراہم کی تھیں۔
یہ بھی پڑھیں: سانحہ گل پلازہ کے متاثرہ تاجروں کے لیے 300 عارضی دکانوں کا قیام
یاد رہے کہ رواں برس جنوری میں پیش آنے والے اس سانحے میں 70 سے زائد افراد جاں بحق ہوئے تھے، یہ مہلک آگ 17 جنوری کی رات بھڑکی تھی جسے مکمل طور پر بجھانے میں تقریباً 2 دن لگے۔
آگ کے نتیجے میں گراؤنڈ سمیت 4 منزلہ عمارت مکمل طور پر تباہ ہو گئی اور اس کے کئی حصے منہدم ہو گئے تھے، واقعے کے بعد تحقیقات کے لیے ایک رکنی جوڈیشل کمیشن تشکیل دیا گیا تھا جس نے اپنی رپورٹ حکومت سندھ کے حوالے کردی۔
