اسلام آباد کے علاقے ایچ 9 میں واقع سستے بازار میں اچانک ہولناک آگ بھڑک اٹھی ہے، جس نے دیکھتے ہی دیکھتے بازار کے ایک بڑے حصے کو اپنی لپیٹ میں لے لیا، جس سے متعدد دکانیں جل کر خاکستر ہوگئی ہیں۔
آگ کی شدت کو دیکھتے ہوئے فائر بریگیڈ کا عملہ فوری طور پر موقع پر پہنچ گیا اور آگ پر قابو پانے کے لیے امدادی کارروائیاں شروع کر دی گئی ہیں۔
آگ پر جلد از جلد قابو پانے اور اسے مزید پھیلنے سے روکنے کے لیے راولپنڈی سے ریسکیو ‘1122’ کی اضافی گاڑیاں اور عملہ بھی طلب کر لیا گیا ہے۔
انتظامیہ کی جانب سے امدادی کاموں کی نگرانی کے لیے اسسٹنٹ کمشنر (اے سی) ایچ نائن خود موقع پر موجود ہیں اور صورتحال کا جائزہ لے رہے ہیں۔
یاد رہے کہ جولائی 2024 میں بھی ایچ نائن سستے بازار میں ایک ہولناک آگ بھڑک اٹھی تھی، جس کی تحقیقات کے لیے 9 رکنی کمیٹی تشکیل دی گئی تھی، اس سے قبل جولائی 2018 بازار کے ایک بڑے حصے میں اچانک آگ لگنے سے 100 کے قریب اسٹالز جل کر راکھ ہو گئے۔
اگست 2017میں بھی اس بازار میں آگ لگنے کا ایک اور بڑا واقعہ پیش آیا جس کی زد میں آ کر 500 سے زائد اسٹالز اور لاکھوں کا سامان جل گیا تھا۔
