امریکی نائب صدر جے ڈی وینس نے انکشاف کیا ہے کہ امریکا اور ایران نے کشیدگی کم کرنے اور ممکنہ تنازعات سے بچنے کے لیے براہِ راست فوجی رابطے کا ایک نیا چینل قائم کرنے پر اتفاق کیا ہے۔
یہ بھی پڑھیں: ’ہم آپ کے شکر گزار ہیں ‘، امریکی نائب صدر جے ڈی وینس کا پاکستان کے سفارتی کردار کا اعتراف
برطانوی ویب سائٹ اَن ہرڈ کو دیے گئے ایک انٹرویو میں جے ڈی وینس نے بتایا کہ اس انتظام کے تحت ایران کی اسلامک ریولوشنری گارڈ کور (آئی آر جی سی) یا پاسداران انقلاب اور امریکی سینٹرل کمانڈ (سینٹ کام) کے نمائندے قطر کے دارالحکومت دوحہ میں ملاقاتیں کریں گے تاکہ اختلافی معاملات کو براہ راست مذاکرات کے ذریعے حل کیا جا سکے اور کشیدگی کو بڑھنے سے روکا جا سکے۔
وینس کے مطابق دونوں ممالک اس بات پر متفق ہوئے ہیں کہ آئی آر جی سی اور سینٹ کام کے نامزد نمائندے دوحہ میں باقاعدہ رابطے کے ذریعے ایسے معاملات پر گفتگو کریں گے جو مستقبل میں تنازع یا غلط فہمی کا باعث بن سکتے ہیں۔
مزید پڑھے: امریکا ایران امن مذاکرات، جے ڈی وینس مرکزی کردار بن گئے، صدر ٹرمپ نے اہم سفارتی ذمہ داری سونپ دی
انہوں نے مزید بتایا کہ متحدہ عرب امارات نے بھی ایران کے ساتھ، بالخصوص آئی آر جی سی کے ساتھ، نئے رابطہ ذرائع قائم کیے ہیں اور تہران کے ساتھ مختلف معاشی مراعات اور تعاون کے امکانات پر غیر معمولی نوعیت کی بات چیت جاری ہے۔
قبل ازیں امریکی وزیر خارجہ مارکو روبیو نے خلیجی اتحادی ممالک کو یقین دہانی کرائی ہے کہ ایران کے ساتھ ہونے والا کوئی بھی معاہدہ ان کی سلامتی اور مفادات کو مدنظر رکھتے ہوئے طے کیا جائے گا۔
مزید پڑھیں: اسلام آباد مذاکرات: جے ڈی وینس امریکا سے صورتحال کی نگرانی کریں گے، وائٹ ہاؤس کا پاکستان کو خراجِ تحسین
بحرین میں خلیج تعاون کونسل (جی سی سی) کے وزرائے خارجہ کے اجلاس سے خطاب کرتے ہوئے مارکو روبیو نے کہا کہ واشنگٹن ایران کے ساتھ ایک پائیدار امن معاہدہ چاہتا ہے تاہم ایسا کوئی اقدام نہیں کیا جائے گا جو خطے میں امریکی اتحادیوں کی سلامتی یا خوشحالی کو نقصان پہنچائے۔
