پاکستان الیکٹرونک میڈیا ریگولیٹری اتھارٹی (پیمرا) نے جیو نیوز کی نشریات 15 روز کے لیے معطل کرنے کے احکامات جاری کرتے ہوئے چینل کو نوٹس بھی جاری کر دیا ہے۔
پیمرا اتھارٹی کی جانب سے جاری کردہ اعلامیے کے مطابق جیو نیوز پر 10 محرم الحرام، 26 جون 2026 کو نشر کیے گئے پروگرام ‘سفرِ عشق’ میں ایسی مذہبی تصویر کشی اور تصوراتی عکاسی کی گئی جو پیمرا کے مطابق ناقابل قبول ہے۔
یہ بھی پڑھیں: پیمرا نے کرائم سینز اور زیر حراست افراد کے انٹرویوز پر پابندی عائد کردی
اعلامیے میں کہا گیا ہے کہ مذکورہ تصویر کشی نہ صرف چینل کے لائسنس کی شرائط کی خلاف ورزی ہے بلکہ مذہبی، معاشرتی اور ثقافتی اقدار و اصولوں کے بھی منافی ہے۔
پیمرا کے مطابق یہ اقدام قوانین اور پیمرا آرڈیننس کی مختلف شقوں کی صریح خلاف ورزی کے زمرے میں آتا ہے، جس سے مذہبی جذبات مجروح ہوئے یا ان کے مجروح ہونے کا خدشہ پیدا ہوا۔
پیمرا نے کہا ہے کہ مذہبی جذبات کے تحفظ اور مذہبی ہم آہنگی کو ممکنہ نقصان سے بچانے کے پیش نظر جیو نیوز کا لائسنس فوری طور پر 15 روز کے لیے معطل کیا جاتا ہے۔
PEMRA Suspends #GeoNews Licence for 15 Days, According to #PEMRA the #suspension has been imposed over the #broadcast of the program "Safar-e-Ishq" on 10 #Muharram (June 26, 2026), in which the authority alleged that an unacceptable depiction of religious content was presented. pic.twitter.com/h11YEd0BIt
— Mian Khurram Shahzad (@miankhuramwatto) June 27, 2026
اس دوران چینل کی نشریات سیٹلائٹ سمیت تمام براڈکاسٹ نیٹ ورکس پر بند رہیں گی، جبکہ تمام ڈسٹری بیوٹرز اور آپریٹرز کو ان احکامات پر فوری عملدرآمد یقینی بنانے کی ہدایت کی گئی ہے۔
اعلامیے کے مطابق مذہبی نوعیت کے پروگرام نشر کرتے وقت جیو نیوز پر لازم تھا کہ وہ غیر معمولی احتیاط برتتا اور ادارے کی اندرونی جانچ کا نظام ایسے مواد کی بروقت نگرانی کرتا۔
مزید پڑھیں: ’لازوال عشق‘ ریئلٹی شو کے خلاف شکایات پر پیمرا کا ردعمل آگیا
تاہم پیمرا کے مطابق چینل اس ذمہ داری کو مؤثر انداز میں نبھانے میں ناکام رہا۔
پیمرا نے مزید کہا ہے کہ اس معاملے پر اس کی شکایات کونسل بھی سماعت کرے گی اور مزید ریگولیٹری کارروائی سے متعلق سفارشات مرتب کرے گی۔
اتھارٹی نے جیو نیوز کو ہدایت کی ہے کہ وہ اپنے ادارے کے اندر بھی اس معاملے کی انکوائری کرے اور ایسے مؤثر اقدامات یقینی بنائے تاکہ مستقبل میں اس نوعیت کی خلاف ورزی دوبارہ رونما نہ ہو۔
