پاکستان میں کھانا پکانے کے شعبے کا ایک معروف نام شیف راحت علی انتقال کر گئیں۔ ان کے انتقال کی خبر سامنے آنے کے بعد مداحوں، فوڈ کمیونٹی اور سوشل میڈیا صارفین کی جانب سے گہرے دکھ اور افسوس کا اظہار کیا جا رہا ہے۔
شیف راحت علی پاکستان کی ان شخصیات میں شمار ہوتی تھیں جنہوں نے گھریلو کھانا پکانے کو آسان اور دلچسپ انداز میں پیش کیا۔ ان کی آسان تراکیب، منفرد پکوان اور سادہ طریقۂ کار نے لاکھوں لوگوں خصوصاً خواتین کو کھانا پکانے کی طرف راغب کیا۔
ان کا خوش اخلاق انداز، مسکراہٹ اور کھانے بنانے کا منفرد طریقہ انہیں ناظرین میں بے حد مقبول بناتا تھا۔ وہ نہ صرف ایک شیف بلکہ بہت سے افراد کے لیے کھانا پکانے کی ترغیب اور رہنمائی کا ذریعہ بھی تھیں۔
Pakistan mourns the loss of Chef Rahat Ali, whose recipes and passion for cooking touched countless homes. May Allah grant her Jannat-ul-Firdous and eternal peace. Ameen. #ChefRahatAli #InMemory #Pakistan #PakistaniCuisine #Condolences pic.twitter.com/NhI6C2xsqx
— anabia umar (@anabia_umar) June 27, 2026
شیف راحت علی کی بھانجی نے بھی سوشل میڈیا پر ان کے انتقال کی خبر شیئر کی، جس کے بعد مداحوں نے تعزیتی پیغامات کا اظہار کرتے ہوئے ان کی خدمات کو خراج عقیدت پیش کیا۔
مرحومہ کی صاحبزادی شیف مائدہ راحت علی بھی کھانا پکانے کے شعبے میں ایک معروف نام ہیں اور امریکا میں مقیم ہیں، جہاں وہ اپنے پیشہ ورانہ سفر کو جاری رکھے ہوئے ہیں۔
شیف راحت علی کے انتقال سے پاکستان کی فوڈ انڈسٹری میں ایک خلا پیدا ہو گیا ہے، جبکہ ان کی سکھائی ہوئی تراکیب اور ان کی یادیں ان کے چاہنے والوں کے درمیان ہمیشہ زندہ رہیں گی۔
