فرانس کے شمال مشرقی شہر نینسی کے قریب ایک چھوٹا مسافر طیارہ حادثے کا شکار ہو کر گرگیا، جس کے نتیجے میں طیارے میں موجود تمام 11 افراد ہلاک ہوگئے۔
غیر ملکی خبر ایجنسی کے مطابق مقامی حکام نے بتایا کہ طیارہ نینسی کے قریب واقع ایئرپورٹ سے اڑان بھرنے کے کچھ ہی دیر بعد ٹومبلین قصبے میں گر کر تباہ ہوا۔
حکام کے مطابق حادثے کا شکار ہونے والے طیارے میں پائلٹ، 5 پیراشوٹرز اور عملے کے ارکان سمیت 11 افراد سوار تھے، جو اسکائی ڈائیونگ سیشن میں شرکت کے لیے جا رہے تھے۔
میورتھے موسیلے برانچ کے آرڈر آف انڈیپنڈنٹ نرسز کے سربراہ تھیر پیچے کے مطابق حادثے میں ہلاک ہونے والوں میں اسکائی ڈائیونگ انسٹرکٹرز کے علاوہ نرسز بھی شامل تھیں، جو ایونٹ میں شرکت کے لیے روانہ ہوئی تھیں۔
مقامی حکام کا کہنا ہے کہ ایمرجنسی سروسز کو متحرک کر دیا گیا ہے اور صورتحال کا جائزہ لیا جا رہا ہے۔
پولیس نے شہریوں سے اپیل کی ہے کہ وہ جائے حادثہ پر جمع ہونے سے گریز کریں اور ایمرجنسی سروسز کے لیے راستہ کھلا رکھیں، تاکہ قانون نافذ کرنے والے ادارے بلا رکاوٹ کارروائی کر سکیں۔
