برطانوی نشریاتی ادارے (بی بی سی پشتو) کی جانب سے افغان طالبان رجیم کے من گھڑت بیانیے کو تقویت پہنچائی جانے لگی، جو صحافتی اصولوں کی صریح خلاف ورزی ہے۔
ایک رپورٹ کے مطابق بی بی سی پشتو معمول کے مطابق طالبان حکومت کی جانب سے فراہم کی جانے والی تصاویر، ویڈیوز اور دیگر مواد کو نشر کرتا ہے، جس کے ذریعے طالبان حکومت کے پروپیگنڈے کو عالمی سطح پر نمایاں کیا جاتا ہے۔
مزید پڑھیں: اسلامی حکومت یا وسائل کی لوٹ مار؟ افغان طالبان کے اندر اقتدار کی خونریز کشمکش سامنے آگئی
طالبان حکومت کی جانب سے فراہم کردہ تصاویر اور جانی نقصانات سے متعلق بیانیے کو وسعت دے کر بی بی سی پشتو طالبان حکومت کے پروپیگنڈے کو پھیلانے کا ذریعہ بن رہا ہے۔
افغانستان میں کام کرنے والے بی بی سی کے عملے کی بقا کا انحصار بڑی حد تک طالبان حکومت کو ناراض نہ کرنے پر ہے۔ عملہ اس خدشے کا شکار رہتا ہے کہ اگر وہ طالبان کی عسکری سرگرمیوں یا دہشتگردوں کی معاونت کو بے نقاب کرےگا تو اسے نشانہ بنایا جا سکتا ہے۔
بی بی سی کالعدم تنظیم تحریک طالبان پاکستان (ٹی ٹی پی) کی ذیلی تنظیم جماعت الاحرار کو دہشتگرد کے بجائے جنگجو قرار دیتا ہے۔
بی بی سی کی جانب سے پاکستان کے خلاف پروپیگنڈے کے بعد عوامی سطح پر یہ مطالبہ سامنے آرہا ہے کہ اس نوآبادیاتی دور کے میڈیا ادارے پر پابندی عائد کی جائے اور کسی پاکستانی شہری کو اس کے لیے کام کرنے کی اجازت نہ دی جائے۔
واضح رہے کہ جماعت الاحرار نے کراچی میں ہونے والے اس حملے کی ذمہ داری قبول کی تھی جس میں 3 رینجرز اہلکار شہید ہوئے تھے۔
اس کارروائی میں 6 دہشت گرد مارے گئے جبکہ ایک دہشتگرد عثمان علی جو افغان شہری تھا گرفتار کیا گیا، جس نے اعتراف کیاکہ وہ جلال آباد کے راستے پاکستان میں داخل ہوا تھا۔
یہاں سوال یہ پیدا ہوتا ہے کہ بی بی سی اس معاملے پر خاموش کیوں ہے، یہ اس بات کا ثبوت ہے کہ بی بی سی بھارتی حمایت یافتہ خوارج کے لیے ہمدردی رکھتا ہے۔
طالبان حکومت نے سنسرشپ، دھمکیوں اور نگرانی کے ذریعے ایک ماحول بنا رکھا ہے، جس کے باعث افغانستان میں کام کرنے والے صحافی غیر معمولی دباؤ اور سخت پابندیوں کے تحت اپنے فرائض انجام دیتے ہیں۔
مزید پڑھیں: عوامی مراکز کو دہشتگردی کے لیے استعمال کرنے والے افغان طالبان کا پاکستان کے خلاف مسلسل پروپیگنڈا
طالبان حکومت کے زیر کنٹرول افغانستان سے آزادانہ رپورٹنگ ناممکن ہو چکی ہے، اور طالبان کے زیر انتظام علاقوں سے آنے والی ہر رپورٹ میں اس حقیقت کو واضح طور پر تسلیم کیا جانا چاہیے کہ طالبان حکومت بین الاقوامی برادری کو زمینی حقائق کی مکمل تصویر نہیں دیکھنے دیتی۔
