آن لائن حج رجسٹریشن کے عمل کو عوام کی جانب سے بھرپور پذیرائی حاصل ہوئی ہے، اور پہلے 11 دنوں کے دوران 2 لاکھ سے زائد افراد نے گھر بیٹھے اپنی رجسٹریشن مکمل کرلی ہے۔ وزارتِ مذہبی امور کے مطابق بڑی تعداد میں عازمین نے سرکاری اور پرائیویٹ حج اسکیموں کا انتخاب کیا ہے۔
وزارتِ مذہبی امور کے مطابق مجموعی طور پر 2 لاکھ 4 ہزار سے زائد عازمین نے اب تک رجسٹریشن کروائی، جن میں سے 1 لاکھ 80 ہزار افراد نے ویب پورٹل جبکہ 24 ہزار نے موبائل ایپ کے ذریعے رجسٹریشن مکمل کی۔
اعلامیے کے مطابق رجسٹریشن کرانے والوں میں سے 1 لاکھ 54 ہزار سے زائد افراد نے سرکاری حج اسکیم جبکہ 49 ہزار افراد نے پرائیویٹ حج اسکیم کا انتخاب کیا۔
صوبائی اعداد و شمار کے مطابق پنجاب سے 95 ہزار، سندھ سے 63 ہزار، خیبرپختونخوا سے 28 ہزار اور اسلام آباد سے 9 ہزار افراد نے رجسٹریشن کرائی ہے۔
اسی طرح بلوچستان سے 5 ہزار 500، آزاد کشمیر سے 1 ہزار 200 اور گلگت بلتستان سے 600 عازمین نے بھی آن لائن رجسٹریشن مکمل کی۔
وزارت کے مطابق رجسٹریشن کرنے والے عازمین میں مردوں کی تعداد 1 لاکھ 19 ہزار جبکہ خواتین کی تعداد 84 ہزار 500 ہے۔
