محکمہ موسمیات نے ملک کے مختلف حصوں کے لیے تازہ موسمی پیش گوئی جاری کرتے ہوئے کہا ہے کہ آئندہ بارہ گھنٹوں کے دوران بیشتر علاقوں میں موسم گرم اور مرطوب رہے گا، جبکہ میدانی علاقوں میں دن کے وقت شدید گرمی برقرار رہنے کا امکان ہے۔
تاہم شمالی علاقوں میں وقفے وقفے سے بارش، گرج چمک اور تیز ہواؤں کا سلسلہ جاری رہ سکتا ہے، جو وسط ہفتہ تک بتدریج جنوبی علاقوں کی جانب بھی پھیلنے کا امکان رکھتا ہے۔
محکمہ موسمیات کے مطابق شام اور رات کے اوقات میں کشمیر، گلگت بلتستان، بالائی خیبرپختونخوا اور شمال مشرقی پنجاب کے چند مقامات پر تیز ہواؤں اور گرج چمک کے ساتھ بارش متوقع ہے۔
یہ بھی پڑھیں: ملک کے مختلف علاقوں میں طوفانی بارشوں کا الرٹ، اسلام آباد و راولپنڈی میں اربن فلڈنگ کا خدشہ
شہریوں، بالخصوص سیاحوں اور پہاڑی علاقوں میں سفر کرنے والوں کو ہدایت کی گئی ہے کہ وہ موسم کی تازہ ترین صورتحال سے آگاہ رہیں اور غیر ضروری سفر سے گریز کرتے ہوئے احتیاطی تدابیر اختیار کریں۔
دوسری جانب 5 جولائی 2026 کو صبح 8 بجے تک گلیشیائی وادیوں میں ریکارڈ کیے گئے کم سے کم درجہ حرارت کے مطابق خیبرپختونخوا کے ضلع چترال کا ارکاری ملک کا سرد ترین مقام رہا، جہاں کم سے کم درجہ حرارت 4 ڈگری سینٹی گریڈ ریکارڈ کیا گیا۔
گلگت بلتستان کے براہ اور سوسات میں 6، درکوت اور غندس میں 8، سترنگ بٹ میں 9 جبکہ بادسوات، پراشنگ اور شمشال میں 10 ڈگری سینٹی گریڈ کم سے کم درجہ حرارت ریکارڈ کیا گیا۔
مزید پڑھیں: خیبرپختونخوا کے بالائی علاقوں میں گلیشیائی جھیلیں پھٹنے کا خطرہ، الرٹ جاری
اسی طرح تتو مٹھٹ میں 11، ہسپر-ہوپر اور شسپر-الٹر میں 12، روپال اور ریشون-بونی میں 14، ارندو اور گلکن میں 15 جبکہ خپلو میں 17 ڈگری سینٹی گریڈ کم سے کم درجہ حرارت ریکارڈ کیا گیا۔
خیبرپختونخوا کے دیگر علاقوں میں مالم جبہ میں 7، مداکلشٹ میں 8، گبرال میں 10 اور مانکیال میں 14 ڈگری سینٹی گریڈ ریکارڈ کیا گیا، جبکہ کنڈیا (کوہستان) میں 22 ڈگری سینٹی گریڈ کے ساتھ نسبتاً زیادہ کم سے کم درجہ حرارت نوٹ کیا گیا۔
مزید پڑھیں: مون سون الرٹ: کیا حکومت گلوف اور فلیش فلڈ کے خطرات سے نمٹنے کے لیے تیار ہے؟
ادھر آج صبح ریکارڈ کیے گئے بڑے شہروں کے کم سے کم درجہ حرارت کے مطابق اسلام آباد میں 26، لاہور 31، کراچی 30، پشاور 29، کوئٹہ 22، گلگت 23، مری 18 اور مظفرآباد 27 ڈگری سینٹی گریڈ ریکارڈ کیا گیا۔
محکمہ موسمیات کے مطابق شمالی اور گلیشیائی علاقوں میں ٹھنڈا موسم برقرار رہے گا، جبکہ میدانی علاقوں میں گرمی اور حبس کی شدت برقرار رہنے کا امکان ہے۔
شہریوں کو موسمی صورتحال کے پیش نظر احتیاطی تدابیر اختیار کرنے اور متعلقہ اداروں کی ہدایات پر عمل کرنے کی تاکید کی گئی ہے۔
