امریکی ٹیکنالوجی کمپنی مائیکروسافٹ نے دنیا بھر میں اپنے ہزاروں ملازمین کو فارغ کرنے کے منصوبے کا اعلان کیا ہے۔ میڈیا رپورٹس کے مطابق کمپنی اپنے عالمی ورک فورس کے تقریباً 4 فیصد، یعنی لگ بھگ 9 ہزار ملازمین کی ملازمتیں ختم کرے گی، جبکہ اس سے قبل بھی گزشتہ برس بڑے پیمانے پر چھانٹیاں کی گئی تھیں۔
خبر رساں ادارے اے ایف پی کے مطابق ملازمتوں میں کٹوتی کا بڑا حصہ مائیکروسافٹ کے گیمنگ ڈویژن ایکس باکس میں ہوگا، جہاں تنظیمِ نو کے عمل کے تحت 3 ہزار 200 سے زائد ملازمتیں متاثر ہوں گی۔
یہ بھی پڑھیے ’میں خوش ہوں کہ مجھے نوکری سے نکالا جارہا ہے‘، مائیکروسافٹ ملازم کا اعتراف وائرل
رپورٹس کے مطابق یہ برطرفیاں ان 4 گیم اسٹوڈیوز کے ملازمین کو بھی متاثر کریں گی جنہیں کمپنی علیحدہ کرنے یا فروخت کرنے کا ارادہ رکھتی ہے۔
ایکس باکس کی چیف ایگزیکٹو آشا شرما نے بتایا کہ تقریباً ایک ہزار 600 ملازمین کو فوری طور پر فارغ کیا جا رہا ہے، جبکہ باقی متاثرہ ملازمین کی برطرفیاں مالی سال 2027 تک مرحلہ وار مکمل کی جائیں گی۔
مائیکروسافٹ کی ایگزیکٹو وائس پریزیڈنٹ ایمی کولمین کا کہنا ہے کہ کمپنی بدلتے ہوئے عالمی کاروباری حالات کے پیش نظر اپنی تنظیمی ساخت میں تبدیلیاں کر رہی ہے۔ انہوں نے کہا کہ ان اقدامات کا مقصد کمپنی کو مستقبل کے تقاضوں سے ہم آہنگ بنانا ہے۔
دوسری جانب ایکس باکس کی انتظامیہ کا کہنا ہے کہ حالیہ برسوں میں گیمنگ کاروبار کی منافع بخش کارکردگی میں نمایاں کمی آئی ہے، جو ملازمتوں میں کٹوتی کی ایک بڑی وجہ ہے۔
رپورٹس کے مطابق آشا شرما نے ایکس باکس کے کاروبار کو ’غیر صحت مند‘ قرار دیتے ہوئے کہا کہ کمپنی کا منافع حریف اداروں کے مقابلے میں 3 سے 10 گنا کم ہے۔
انہوں نے مزید بتایا کہ گیم پاس سبسکرپشن سروس کی قیمتوں میں اضافے کے بعد لاکھوں صارفین نے اپنی رکنیت ختم کر دی، جس سے کمپنی کو مالی نقصان اٹھانا پڑا۔ بعد ازاں صارفین کو واپس لانے کے لیے سبسکرپشن فیس میں کمی کرنا پڑی۔
