وزیراعلیٰ بلوچستان سرفراز بگٹی نے کہا ہے کہ شہدا کے خون کا ایک ایک قطرہ قوم کی امانت ہے، دہشتگردوں کو ہر قیمت پر انجام تک پہنچایا جائے گا۔
وزیراعلیٰ بلوچستان میر سرفراز بگٹی کی زیر صدارت مانگی ڈیم واقعہ اور صوبے میں امن و امان کی مجموعی صورتحال پر ایک اعلیٰ سطحی اجلاس منعقد ہوا، جس میں صوبائی وزیر داخلہ میر ضیا لانگو، اراکین صوبائی اسمبلی، انسپکٹر جنرل پولیس بلوچستان محمد طاہر خان اور دیگر اعلیٰ حکام نے شرکت کی۔
مزید پڑھیں: ریاست پوری قوت کے ساتھ دہشتگردوں کے عزائم ناکام بنا رہی ہے، وزیراعلیٰ بلوچستان
اجلاس کے دوران آئی جی پولیس بلوچستان محمد طاہر خان نے مانگی ڈیم واقعہ اور دہشتگردوں کے خلاف جاری آپریشن سے متعلق تفصیلی بریفنگ دی۔
بریفنگ میں سیکیورٹی صورتحال، آپریشن کی پیشرفت اور آئندہ کے لائحہ عمل سے متعلق شرکا کو آگاہ کیا گیا۔
اس موقع پر وزیراعلیٰ بلوچستان میر سرفراز بگٹی نے ہدایت کی کہ دہشتگردوں کے خلاف جاری آپریشن کو ہر صورت منطقی انجام تک پہنچایا جائے۔
وزیراعلیٰ نے واضح کیا کہ فتنہ الخوارج اور فتنہ الہندوستان کے سہولت کار بھی قانون کی گرفت سے نہیں بچ سکیں گے۔
انہوں نے ہدایت کی کہ بلوچستان میں ریاست کی رٹ کو ہر قیمت پر یقینی بنایا جائے اور امن دشمن عناصر کے خلاف کارروائیوں میں مزید تیزی اور مؤثر ہم آہنگی لائی جائے۔
میر سرفراز بگٹی نے کہاکہ دہشتگردوں کو کسی صورت دوبارہ منظم ہونے کا موقع نہ دیا جائے۔
انہوں نے اس عزم کا اظہار کیاکہ بلوچستان کے امن پر کوئی سمجھوتہ نہیں ہوگا اور دہشتگردی کے مکمل خاتمے تک کارروائیاں جاری رہیں گی۔
مزید پڑھیں: بلوچستان دیکھنے کی چاہ میں آئے سیاح کے قتل کا مقدمہ درج، دہشتگردی سمیت متعدد دفعات شامل
وزیراعلیٰ بلوچستان نے پولیس، لیویز، ایف سی اور دیگر سیکیورٹی اداروں کی قربانیوں کو قوم کا سرمایہ قرار دیتے ہوئے کہا کہ امن و امان کے قیام اور عوام کے جان و مال کے تحفظ کے لیے تمام دستیاب وسائل بروئے کار لائے جائیں۔
