وفاقی وزیر پیٹرولیم علی پرویز ملک نے کہا ہے کہ حکومت عالمی منڈی میں پیٹرولیم مصنوعات کی قیمتوں پر مسلسل نظر رکھے ہوئے ہے اور جیسے ہی قیمتوں میں مزید کمی کی گنجائش پیدا ہوئی، اس کا براہِ راست فائدہ عوام کو پہنچایا جائے گا۔
پارلیمنٹ ہاؤس میں میڈیا سے گفتگو کرتے ہوئے علی پرویز ملک نے کہاکہ انہوں نے قومی اسمبلی کی قائمہ کمیٹی برائے پیٹرولیم کے سامنے تمام حقائق رکھے ہیں۔
مزید پڑھیں: پیٹرول اور ڈیزل پر کلائمیٹ سپورٹ لیوی دگنی کردی گئی، رواں مالی سال 95 ارب روپے وصولی کا ہدف
ان کے مطابق اگرچہ خام تیل کی عالمی قیمتیں دوبارہ جنگ سے پہلے والی سطح پر آ چکی ہیں، تاہم پاکستان جو پیٹرول درآمد کرتا ہے اس کی قیمت اب بھی جنگ سے پہلے کے مقابلے میں قریباً 15 ڈالر فی بیرل زیادہ ہے۔
انہوں نے کہاکہ ملک اپنی ضرورت کا قریباً 70 سے 80 فیصد پیٹرول بیرون ملک سے درآمد کرتا ہے، اسی وجہ سے درآمدی لاگت میں اضافے کے اثرات برقرار ہیں۔
ان کا کہنا تھا کہ جب بھی مالی گنجائش پیدا ہوئی، وزیراعظم نے عوام کو ریلیف دیتے ہوئے پیٹرول کی قیمت میں 70 سے 80 روپے تک کمی کی، اور آئندہ بھی اگر عالمی مارکیٹ میں قیمتیں مزید نیچے آئیں تو اس کا فائدہ صارفین تک منتقل کیا جائے گا۔
وفاقی وزیر نے حالیہ جنگی صورتحال کا حوالہ دیتے ہوئے کہا کہ اسٹریٹجک ذخائر اور مطلوبہ وسائل محدود ہونے کے باوجود ملک میں سپلائی کا نظام برقرار رکھا گیا۔
انہوں نے بتایا کہ اسٹریٹجک آئل اسٹوریج کے قیام سے متعلق ایک عالمی سطح کی اسٹڈی کرائی گئی ہے، جس پر دو مختلف فرمز کام کر رہی ہیں۔
علی پرویز ملک نے تیل و گیس کی مقامی تلاش کے حوالے سے کہا کہ اگر کمپنیوں کو سرمایہ فراہم نہیں کیا جائے گا تو وہ نئے ذخائر کی تلاش کیسے کریں گی۔
واضح رہے کہ حکومت نے 4 جولائی کو پیٹرولیم مصنوعات کی قیمتوں میں ردوبدل کرتے ہوئے پیٹرول کی فی لیٹر قیمت میں ایک روپے 97 پیسے اور ہائی اسپیڈ ڈیزل کی فی لیٹر قیمت میں بھی ایک روپے 97 پیسے کمی کی تھی۔
مزید پڑھیں: پیٹرولیم مصنوعات صارفین کے ہاتھ سے نکل گئیں، گزشتہ ماہ فروخت میں 20 فیصد کمی
اس کمی کے بعد پیٹرول کی نئی قیمت 297 روپے 53 پیسے فی لیٹر جبکہ ہائی اسپیڈ ڈیزل کی قیمت 309 روپے 50 پیسے فی لیٹر مقرر کی گئی۔
