پاکستان کے سینئر اداکار فردوس جمال نے بالی ووڈ کے سپر اسٹار شاہ رخ خان کی اداکاری پر تنقید کرتے ہوئے انہیں ایک بڑا اسٹار تو قرار دیا تاہم انہیں بڑا اداکار ماننے سے انکار کر دیا۔
فردوس جمال حال ہی میں اداکار و میزبان محسن عباس حیدر کے شو میں بطور مہمان شریک ہوئے جہاں انہوں نے مختلف فنکاروں اور ان کی فنی صلاحیتوں پر کھل کر اظہارِ خیال کیا۔
گفتگو کے دوران فردوس جمال نے کہا کہ وہ بالی ووڈ کے لیجنڈری اداکار دلیپ کمار کے مداح ہیں لیکن شاہ رخ خان کا دلیپ کمار سے موازنہ درست نہیں۔ ان کے مطابق دلیپ کمار ایک منفرد اور عظیم اداکار تھے جبکہ شاہ رخ خان اس معیار کی اداکاری پیش نہیں کر سکے۔
ان کا مزید کہنا تھا کہ شاہ رخ خان کی ادائیگی، تلفظ اور اندازِ گفتگو میں وہ پختگی نظر نہیں آتی جو ایک عظیم اداکار کی پہچان ہوتی ہے۔ انہوں نے مزید کہا کہ شاہ رخ خان ایک غیر معمولی شہرت رکھنے والے سپر اسٹار ضرور ہیں، لیکن بطور اداکار ان کا مقام اتنا بلند نہیں جتنا ان کی مقبولیت ہے۔
