نیشنل ڈائیلاگ کمیٹی نے کوٹ لکھپت جیل میں پاکستان تحریک انصاف کے اسیر رہنماؤں سے تفصیلی ملاقات کی ہے۔
سابق وزیر اطلاعات فواد چوہدری نے مائیکروبلاگنگ سائٹ ایکس پر اپنے پیغام میں بتایا کہ کمیٹی کے مطابق ملاقات میں ملک کو درپیش سیاسی اور معاشی بحران پر سیر حاصل گفتگو ہوئی،وفد میں محمود مولوی، عمران اسماعیل اور فواد چوہدری شامل تھے۔
یہ بھی پڑھیں: صدر زرداری، نواز شریف اور وزیراعظم کی مشاورت سے حکومتی مذاکراتی کمیٹی تشکیل دی جائے، نیشنل ڈائیلاگ کمیٹی کی تجویز
فواد چوہدری کے مطابق اسیر رہنماؤں نے نیشنل ڈائیلاگ کمیٹی کی جانب سے تجویز کردہ حل کی مکمل حمایت کرتے ہوئے کہا کہ موجودہ حالات میں آگے بڑھنے کا راستہ مذاکرات ہیں، جبکہ دہشتگردی کے عفریت کا مؤثر مقابلہ کرنے کے لیے قومی اتحاد ناگزیر ہے۔
نیشنل ڈائیلاگ کمیٹی کے وفد نے جو محمود مولوی، عمران اسماعیل اور فواد چوہدری پر مشتمل تھانے آج کوٹ ککھپت جیل میں تحریک انصاف کے اسیررہنماؤں سے تفصیلی ملاقات کی، ملاقات میں ملک کو درپیش سیاسی اور معاشی بحران پر سیر حاصل گفتگو ہوئی ، اسیر رہنماؤں نے نیشنل ڈائیلاگ کمیٹی کے تجویز… https://t.co/ekSEurjAzZ
— Ch Fawad Hussain (@fawadchaudhry) July 10, 2026
شاہ محمود قریشی نے فیلڈ مارشل عاصم منیر کے بین الاقوامی سفارتی کردار کو سراہتے ہوئے کہا کہ جس طرح انہوں نے بین الاقوامی سفارتکاری کے ذریعے اہم مسائل کے حل میں کردار ادا کیا، اسی طرح ملک کے اندر سیاسی استحکام کے لیے بھی قومی مکالمے کا آغاز ضروری ہے۔
یہ بھی پڑھیں: پی ٹی آئی کے سابق رہنماؤں کی مولانا فضل الرحمان سے اہم ملاقات، کیا اپوزیشن میں نئی صف بندیاں سامنے آئیں گی؟
اسیر رہنماؤں نے تحریک انصاف کو مشورہ دیا کہ وہ معاملات کے حل اور آگے بڑھنے کی کوششوں کا ساتھ دے تاکہ سیاسی ماحول میں کشیدگی کم ہو اور سیاسی قیدیوں کی رہائی کی راہ ہموار ہوسکے۔
نیشنل ڈائیلاگ کمیٹی کے مطابق عمران خان کو علاج کی مناسب سہولت فراہم کرنا اور ان سے ملاقاتوں پر عائد پابندیوں کا خاتمہ بھی ملک کے سیاسی درجۂ حرارت میں نمایاں کمی لانے میں مددگار ثابت ہو سکتا ہے۔
