امریکی ریاست جارجیا میں بھارتی نژاد گوگل کی سینیئر انجینیئرنگ ایگزیکٹو شیتل ورزیسن کو مبینہ طور پر ان کے شوہر نے فائرنگ کر کے قتل کر دیا، جبکہ ان کا 23 سالہ بیٹا بھی اس واقعے میں زخمی ہو گیا۔ پولیس نے واقعے کو گھریلو تشدد کا معاملہ قرار دیتے ہوئے ملزم کو گرفتار کر لیا ہے۔
امریکی ریاست جارجیا کے شہر سمرنا میں بھارتی نژاد گوگل ٹیکنالوجی ایگزیکٹو شیتل ورزیسن اپنے گھر میں فائرنگ کے واقعے میں ہلاک ہو گئیں، جبکہ ان کا بیٹا جیسن ورزیسن زخمی ہو گیا۔
Indian-origin former Google employee shot dead by husband in US' Georgia; son surviveshttps://t.co/ST4EsBgUpP
— Hindustan Times (@htTweets) July 11, 2026
مقامی میڈیا رپورٹس کے مطابق پولیس کو منگل کی رات مقامی وقت کے مطابق تقریباً 8 بجے فائرنگ کی اطلاع ملی۔ پولیس کے گھر پہنچنے پر 57 سالہ شیتل ورزیسن کو گولیوں کے زخموں کے ساتھ گھر کے اندر پایا گیا، تاہم وہ بعد میں زخموں کی تاب نہ لاتے ہوئے چل بسیں۔
ان کا 23 سالہ بیٹا جیسن ورزیسن گھر کے باہر زخمی حالت میں ملا، جسے فوری طور پر اسپتال منتقل کر دیا گیا۔
پولیس نے 56 سالہ کرک بی ورزیسن کو گرفتار کر لیا ہے۔ ان پر قتل، 2 سنگین حملوں اور جرم کے دوران آتشیں اسلحہ رکھنے کے الزامات عائد کیے گئے ہیں۔ انہیں کوب کاؤنٹی ایڈلٹ ڈیٹینشن سینٹر میں بغیر ضمانت کے رکھا گیا ہے۔
یہ بھی پڑھیں:واشنگٹن: بھارتی خاتون کے قتل کا معمہ حل، شوہر پر گلا دبا کر قتل کا الزام عائد
پولیس کے مطابق واقعہ گھریلو تشدد کا نتیجہ معلوم ہوتا ہے اور عوام کے لیے کسی مزید خطرے کی اطلاع نہیں ملی۔ حکام نے فائرنگ کی وجہ یا ممکنہ محرک کے بارے میں ابھی کوئی تفصیلات جاری نہیں کیں، جبکہ جیسن کی طبی حالت کے بارے میں بھی تازہ معلومات فراہم نہیں کی گئیں۔
شیتل ورزیسن گوگل میں انجینیئرنگ لیڈر کے طور پر خدمات انجام دے رہی تھیں اور ٹیکنالوجی کے شعبے میں انہیں 2 دہائیوں سے زائد تجربہ حاصل تھا۔ گوگل میں شمولیت سے قبل انہوں نے HomeDepot.com میں موبائل اور ڈیجیٹل ٹرانسفارمیشن منصوبوں کی قیادت کی تھی۔
انہوں نے انگلینڈ، بھارت اور گھانا میں پرورش پائی اور بعد ازاں امریکا منتقل ہو کر جارجیا انسٹیٹیوٹ آف ٹیکنالوجی سے کمپیوٹر سائنس کی تعلیم حاصل کی۔ وہ دو سافٹ ویئر پیٹنٹس کی شریک موجد بھی تھیں اور جارجیا ٹیک کالج آف کمپیوٹنگ کے مشاورتی بورڈ اور جارجیا ٹیک ایلومنائی ایسوسی ایشن کے بورڈ آف ٹرسٹیز کی رکن رہ چکی تھیں۔ پولیس واقعے کی مزید تحقیقات کر رہی ہے۔
