وزیراعلیٰ پنجاب مریم نواز شریف نے پرتگالی کمپنیوں کو پنجاب میں سرمایہ کاری کی دعوت دیتے ہوئے کہا ہے کہ پاکستان اور پرتگال کے درمیان تجارت، توانائی، صحت، ڈیجیٹل جدت اور دیگر شعبوں میں تعاون کے وسیع مواقع موجود ہیں۔
یہ بات انہوں نے پاکستان میں پرتگال کے سفیر پالو ڈومینگوز سے ملاقات کے دوران کہی، جس میں دوطرفہ تعلقات کو مزید مضبوط بنانے پر اتفاق کیا گیا۔
ملاقات میں پاکستان اور پرتگال کے درمیان دوطرفہ تعلقات، تجارت، سرمایہ کاری، زراعت، لائیو اسٹاک، سیاحت، ثقافتی روابط اور باہمی دلچسپی کے دیگر شعبوں میں تعاون کے فروغ پر تفصیلی تبادلہ خیال کیا گیا۔
یہ بھی پڑھیں: وزیر تعلیم ہر ہفتے اسکول میں کلاس لیں گے، وزیراعلیٰ پنجاب مریم نواز کی ہدایت
وزیراعلیٰ مریم نواز شریف نے پرتگالی سفیر کو لاہور آمد پر خوش آمدید کہتے ہوئے ان کا شکریہ ادا کیا اور پرتگالی کمپنیوں کو پنجاب میں کاروبار اور سرمایہ کاری کی دعوت دی۔
انہوں نے کہا کہ پاکستان اور پرتگال کے درمیان دیرینہ دوستانہ تعلقات کو مزید وسعت دینے کے وسیع امکانات موجود ہیں، جبکہ فارماسیوٹیکل، توانائی، آبی وسائل، صحت اور ڈیجیٹل جدت کے شعبوں میں دونوں ممالک کے درمیان باہمی تعاون کو فروغ دیا جا سکتا ہے۔
ملاقات کے دوران پاکستان اور پرتگال کے درمیان کاروباری روابط مضبوط بنانے کے لیے پاکستان پرتگال بزنس فورم کے قیام کی تجویز پر بھی غور کیا گیا، جبکہ لاہور اور پرتگال کے دارالحکومت لزبن کے درمیان ثقافتی اور تعلیمی تبادلوں کے فروغ کے لیے سسٹر سٹی تعلقات قائم کرنے پر بھی تفصیلی گفتگو ہوئی۔
وزیراعلیٰ مریم نواز سے پرتگال کے سفیر پالو ڈومینگوز کی ملاقات میں پرتگالی سفیر کی جانب سے ایران اور امریکہ کے درمیان مذاکرات میں پاکستان کے تعمیری کردار کو سراہا۔ انہوں نے وزیراعلیٰ مریم نواز کی قیادت میں صحت کے شعبے میں ہونے والی پیش رفت، خصوصاً کینسر ہسپتال کے قیام اور عوامی… pic.twitter.com/laLlJNIsKz
— Bilal Rizwan (@BilalRixwan1) July 13, 2026
وزیراعلیٰ پنجاب نے کہا کہ سیاحت، ثقافتی تبادلوں اور عوامی روابط کے فروغ سے دونوں ممالک کے تعلقات مزید مستحکم ہوں گے۔
انہوں نے اس امید کا اظہار کیا کہ ادارہ جاتی تعاون کے ذریعے پاکستان اور پرتگال کے تعلقات کو نئی جہت دی جا سکتی ہے۔
مریم نواز شریف نے یہ بھی کہا کہ پاکستان میں نوجوانوں کی بڑی تعداد پرتگالی فٹ بال اسٹار کرسٹیانو رونالڈو کی مداح ہے، جبکہ پرتگالی ثقافت، زبان، ورثے اور علمی تبادلوں کے فروغ سے دونوں ممالک کے عوام مزید قریب آ سکتے ہیں۔
مزید پڑھیں: وزیراعلیٰ مریم نواز نے سیلاب اور مون سون سے نمٹنے کے لیے پیشگی تیاریوں کی ہدایت کردی
اس موقع پر پرتگال کے سفیر پالو ڈومینگوز نے لاہور کے پکوانوں اور اہلِ لاہور کی مہمان نوازی کو سراہا۔
انہوں نے ایران اور امریکا کے درمیان مذاکرات میں پاکستان کے تعمیری سفارتی کردار کی تعریف کرتے ہوئے کہا کہ مشرقِ وسطیٰ میں پائیدار امن اور استحکام کے فروغ کے لیے پاکستان کی کوششیں قابلِ تحسین ہیں۔
پرتگالی سفیر نے وزیراعلیٰ مریم نواز شریف کو پنجاب میں پہلے سرکاری کینسر اسپتال کے قیام اور صحت کے شعبے میں ریکارڈ اقدامات پر خراجِ تحسین پیش کیا۔
مزید پڑھیں: ’اپنا کھیت اپنا روزگار اسکیم‘ کی قرعہ اندازی، مریم نواز کا کامیاب افراد کو زرعی زمین دینے کا اعلان
انہوں نے یقین دہانی کرائی کہ پرتگال پاکستانی تاجروں کو وہاں سرمایہ کاری کے لیے سازگار ماحول فراہم کرے گا۔
ملاقات کے اختتام پر پرتگالی سفیر نے وزیراعلیٰ مریم نواز شریف کو پرتگال کے سرکاری دورے کی دعوت بھی دی، جبکہ دونوں فریقوں نے پاکستان اور پرتگال کے درمیان دوطرفہ تعلقات، تجارت، سرمایہ کاری، سیاحت، تعلیم اور ثقافتی تعاون کو مزید وسعت دینے کے عزم کا اظہار کیا۔
