آزاد کشمیر پولیس نے کہا ہے کہ راولاکوٹ کے نئے بس ٹرمینل کے قریب کالعدم جوائنٹ ایکشن کمیٹی کے مظاہرین اور مسلح افراد کی جانب سے سیکیورٹی اہلکاروں پر فائرنگ کا واقعہ پیش آیا، جس کے نتیجے میں ایک سیکیورٹی اہلکار جاں بحق جبکہ ایک زخمی ہوگیا۔
یہ بھی پڑھیں: جموں کشمیر جوائنٹ عوامی ایکشن کمیٹی کے اہم رہنما راجہ امجد علی کا لاتعلقی کا اعلان، نوجوانوں کو دور رہنے کی اپیل
آزاد کشمیر پولیس کی جانب سے جاری بیان کے مطابق کالعدم تنظیم جے اے اے سی گزشتہ ہفتے عوامی حمایت حاصل کرنے میں ناکام رہی، جس کے بعد مبینہ طور پر صبح سویرے بس ٹرمینل کے عمومی علاقے میں بلااشتعال فائرنگ کی گئی تاکہ اس کا الزام سیکیورٹی فورسز پر عائد کیا جاسکے۔
— AJKPolice (@AJKPoliceCPO) July 14, 2026
بیان میں کہا گیا ہے کہ واقعے کی فضائی نگرانی کے ذریعے بھی تصدیق کی گئی، جبکہ ویڈیو شواہد میں بھی فائرنگ کا عمل دیکھا جاسکتا ہے۔
حکام کے مطابق جب پولیس اور سیکیورٹی فورسز نے صورتحال پر قابو پانے کے لیے پیش قدمی کی تو ان پر بھی فائرنگ کی گئی، جس کے نتیجے میں ایک بہادر سیکیورٹی اہلکار شہید جبکہ ایک اہلکار زخمی ہوا۔
یہ بھی پڑھیں: کالعدم عوامی ایکشن کمیٹی سے وابستہ 150 متحرک افراد شیڈول فورتھ میں شامل، فہرست اور نوٹیفکیشن جاری
بیان میں مزید کہا گیا ہے کہ جے اے اے سی سے منسلک افراد کی جانب سے دھماکہ خیز مواد کے استعمال کی بھی تصدیق ہوئی ہے۔
حکام نے کہا کہ علاقے کو فوری طور پر کالعدم جے اے اے سی کے ارکان اور مسلح افراد سے کلیئر کرانا ضروری ہے، کیونکہ مقامی آبادی کو مبینہ طور پر اسلحے کے زور پر یرغمال بنایا گیا ہے۔
بیان کے مطابق 14 جولائی کی صبح پیش آنے والے واقعات نے کالعدم جے اے اے سی کے مبینہ پرتشدد کردار اور مسلح عناصر کی موجودگی کو ظاہر کیا ہے۔
