جدید دور میں کسی بھی سیاحتی مقام کی کامیابی کا انحصار صرف اس کے قدرتی حسن پر نہیں بلکہ اس بات پر بھی ہے کہ وہ سیاحوں کو کس حد تک ایک جامع، خوشگوار اور یادگار تجربہ فراہم کرتا ہے۔
ماہرین کے مطابق اسی تصور کو سیاحتی نفسیات کہا جاتا ہے، جو سیاحوں کے سفر سے پہلے، دورانِ سفر اور سفر کے بعد ان کے رویوں، توقعات، محرکات اور تاثرات کا جائزہ لیتی ہے۔
یہ بھی پڑھیں: سعودی عرب کا ماحول دوست سیاحتی منصوبہ ’العُرومہ سیزن‘، 6 ماہ میں 8 لاکھ سے زائد سیاحوں کی آمد
اس شعبے کا مقصد ایسے سیاحتی تجربات کی تشکیل ہے جو نہ صرف سیاحوں کی تسکین کا باعث بنیں بلکہ انہیں دوبارہ آنے کی ترغیب دیں اور متعلقہ مقام کا مثبت تشخص بھی اجاگر کریں۔
سعودی عرب کا شہر طائف اس تصور کی نمایاں مثال بن کر سامنے آیا ہے، جہاں قدرتی، ثقافتی اور تاریخی ورثے کا منفرد امتزاج سیاحوں کو اپنی جانب متوجہ کرتا ہے۔
Rural Tourism in Taif: Investments Grow amid the Mountains.https://t.co/ydI5JmoxRX#SPAGOV pic.twitter.com/umBmVHYwwS
— SPAENG (@Spa_Eng) July 14, 2026
سعودی پریس ایجنسی کے مطابق الشفا اور الہدا کے بلند پہاڑی علاقے، سرسبز وادیاں، پارکس، ریزورٹس، دیہی رہائش گاہیں، گلاب کے باغات، روایتی بازار اور تاریخی دیہات سیاحوں کو سکون، ثقافتی آگاہی اور مقامی ماحول سے جڑنے کا منفرد موقع فراہم کرتے ہیں، جبکہ معتدل موسم اس تجربے کو مزید خوشگوار بنا دیتا ہے۔
ام القریٰ یونیورسٹی کے پروفیسر صبحی الحارثی کا کہنا ہے کہ سیاحتی نفسیات سیاحوں کی ضروریات، توقعات اور ان کے فیصلوں پر اثر انداز ہونے والے عوامل کو سمجھنے میں مدد دیتی ہے۔
ان کے مطابق آج کسی بھی سیاحتی مقام کی کامیابی صرف دلکش مناظر سے نہیں ناپی جاتی بلکہ معیاری خدمات، آسان رسائی، بہترین مہمان نوازی، مؤثر رہنمائی اور چھوٹی سے چھوٹی تفصیلات پر توجہ بھی اہم کردار ادا کرتی ہیں۔
’یہی عوامل سیاحوں پر مثبت اثر چھوڑتے ہیں، انہیں دوبارہ آنے پر آمادہ کرتے ہیں اور وہ اپنے خوشگوار تجربات دوسروں سے بھی شیئر کرتے ہیں۔‘
مزید پڑھیں: سعودی عرب کو عالمی سیاحتی مرکز بنانے کی جانب اہم قدم، تشہیر کے لیے خصوصی طیارہ متعارف
پروفیسر الحارثی نے کہا کہ طائف مملکت میں سیاحتی نفسیات کے عملی اطلاق کی بہترین مثالوں میں سے ایک ہے، کیونکہ یہاں کے قدرتی مناظر، وادیاں اور سرسبز مقامات سیاحوں کو ذہنی سکون اور راحت فراہم کرتے ہیں۔
’جبکہ دیہی رہائش گاہیں، زرعی فارم، روایتی بازار اور ثقافتی تقریبات انہیں مقامی شناخت سے قریب لاتے ہوئے ان کے سیاحتی تجربے کو مزید بھرپور اور یادگار بناتے ہیں۔‘
انہوں نے اس بات پر بھی زور دیا کہ مقامی آبادی کا سیاحوں کے ساتھ خوش اخلاقی اور مثبت رویہ کسی بھی سیاحتی مقام کی کامیابی کا بنیادی عنصر ہے۔
’مہمان نوازی کے فروغ، عزت و احترام کے ساتھ پیش آنے اور پیشہ ورانہ انداز میں خدمات فراہم کرنے سے نہ صرف سیاحوں کا تجربہ بہتر ہوتا ہے بلکہ طائف کی سیاحتی مسابقت بھی مضبوط ہوتی ہے۔‘
