اقرار الحسن کی پہلی اور دوسری اہلیہ کے مشترکہ پوڈکاسٹ کی ایک ویڈیو سوشل میڈیا پر تیزی سے وائرل ہو رہی ہے جس میں دونوں شادی شدہ زندگی، رشتوں میں درپیش مسائل اور بڑھتی ہوئی طلاق و خلع کی شرح پر اپنے خیالات کا اظہار کرتی نظر آتی ہیں۔
پوڈکاسٹ کے دوران فرح اقرار نے سوال کیا کہ موجودہ دور میں ازدواجی رشتوں میں مشکلات میں اضافہ ہو رہا ہے اور طلاق یا خلع کے واقعات بھی بڑھتے جا رہے ہیں ایسے میں ایک خوشگوار ازدواجی زندگی گزارنے کے لیے کیا کرنا چاہیے؟
View this post on Instagram
اس سوال کے جواب میں اقرار الحسن کی پہلی اہلیہ قرۃ العین نے کہا کہ کامیاب ازدواجی زندگی دونوں فریقین کی مشترکہ ذمہ داری ہوتی ہے۔ ان کے مطابق رشتہ صرف ایک فرد کے سہارے نہیں چل سکتا، یہ دو طرفہ کوشش اور تعاون کا تقاضا کرتا ہے۔
انہوں نے کہا کہ آج کل لوگوں میں برداشت اور صبر کی کمی دیکھنے میں آ رہی ہے جس کی وجہ سے معمولی اختلافات پر ایک دوسرے کو جلدی جج کر لیا جاتا ہے اور فوری فیصلے کرتے ہوئے راستے الگ کر لیے جاتے ہیں۔
یہ بھی پڑھیں: اقرار الحسن کی پہلی بیوی قرۃ العین کا شوہر کی تیسری بیوی عروسہ کو انٹرویو، کیا اہم باتیں ہوئیں؟
قرۃ العین کا کہنا تھا کہ کسی بھی رشتے کو مضبوط بنانے کے لیے اسے وقت دینا، ایک دوسرے کو سمجھنا اور باہمی احترام کے ساتھ سمجھوتہ کرنا ضروری ہے۔ ان کے مطابق اگر صرف ایک ہی شخص مسلسل سمجھوتہ کرتا رہے تو ایک وقت ایسا آتا ہے جب اس کی برداشت کی حد ختم ہو جاتی ہے، اس لیے رشتے کو کامیاب بنانے کے لیے دونوں جانب سے یکساں کوشش ناگزیر ہے۔
