وزیراعلیٰ بلوچستان سرفراز بگٹی نے کہا ہے کہ کالعدم تحریک طالبان پاکستان (ٹی ٹی پی) اور کالعدم بلوچ لبریشن آرمی (بی ایل اے) سمیت پاکستان میں سرگرم دہشتگرد تنظیموں کے پسِ پردہ بھارتی خفیہ ایجنسی ’را‘ کا کردار ہے۔
اپنے بیان میں انہوں نے کہاکہ بلوچستان میں امن کا قیام یقینی بنایا جائے گا اور عوام جلد مثبت تبدیلی محسوس کریں گے۔
ٹی ٹی پی، بی ایل اے اور دیگر دہشت گرد تنظیموں کو بھارت کی خفیہ ایجنسی را کی پشت پناہی حاصل ہے۔ انہیں مالی معاونت، تربیت اور دیگر سہولتیں فراہم کی جا رہی ہیں، جبکہ افغانستان کی سرزمین پاکستان کے خلاف استعمال ہو رہی ہے۔
مجھے اپنی سکیورٹی فورسز اور حکومت کی صلاحیت، عزم اور استعداد… pic.twitter.com/Kx5oUVT5Qk— WE News (@WENewsPk) July 18, 2026
ان کا کہنا تھا کہ کسی بھی طاقت میں یہ صلاحیت نہیں کہ وہ بلوچستان کو امن اور ترقی کی راہ پر گامزن ہونے سے روک سکے، کیونکہ پاکستان اور بلوچستان ایک دوسرے سے جدا نہیں ہو سکتے۔
آئی ایس پی آر سمر کیمپ میں طلبہ سے گفتگو
اس سے قبل آئی ایس پی آر کے زیر اہتمام سمر کیمپ میں طلبہ و طالبات سے خصوصی نشست کے دوران وزیراعلیٰ بلوچستان نے کہا کہ دہشتگردوں نے بلوچستان کے بہادر عوام کو صرف اس لیے بے دردی سے شہید کیا کیونکہ انہوں نے دہشتگردوں کا ساتھ دینے سے انکار کیا۔
انہوں نے کہاکہ منگی ڈیم پر حملے کا مقصد بلوچستان کے لیے پانی کی فراہمی کے اہم منصوبے کو نقصان پہنچانا تھا۔ پولیس پر حملے کے بعد امدادی کارروائی کے لیے پہنچنے والی فورس کو بھی نشانہ بنایا گیا۔
سرفراز بگٹی نے کہاکہ اس واقعے کی تحقیقات کے لیے جوڈیشل کمیشن قائم کردیا گیا ہے اور تمام حقائق جلد قوم کے سامنے لائے جائیں گے۔
ریاست مخالف پروپیگنڈا ناکام بنانے کا عزم
وزیراعلیٰ بلوچستان نے کہاکہ کوئٹہ میں ہونے والے دھرنے کے دوران بعض سیاسی رہنماؤں نے ریاست کے خلاف گمراہ کن بیانیہ پیش کیا، تاہم پاکستان کے خلاف جاری منظم سازش کو پاک فوج اور بلوچستان کے عوام مل کر ناکام بنائیں گے۔
انہوں نے کہاکہ بھارت کی جارحیت کے دوران پاکستان نے فیلڈ مارشل کی قیادت میں بھرپور اور مؤثر جواب دیا، جبکہ ’معرکۂ حق‘ کے دوران پوری قوم افواجِ پاکستان کے شانہ بشانہ کھڑی رہی۔
دہشتگردی کسی صورت قابل قبول نہیں
سرفراز بگٹی کا کہنا تھا کہ بھارت کی سرپرستی میں کام کرنے والے دہشتگرد اپنے سرپرستوں کا انجام دیکھ چکے ہیں۔
انہوں نے واضح کیاکہ دہشتگردی اور تشدد کو کسی بھی صورت جائز قرار نہیں دیا جا سکتا۔
انہوں نے کہاکہ پاکستان ایک مضبوط قومی ریاست ہے اور ہمیشہ قائم و دائم رہے گا۔ ملک اور بلوچستان کا مستقبل روشن ہے اور ایسا وقت آئے گا جب ہر شہری بلاخوف و خطر آزادانہ زندگی گزار سکے گا۔
وزیراعلیٰ بلوچستان نے ایک بار پھر کہاکہ افغانستان کی سرزمین پاکستان کے خلاف دہشتگردی کی کارروائیوں کے لیے استعمال ہو رہی ہے۔
