پاکستان کی سینئر اداکارہ بشریٰ انصاری کی ایک ویڈیو سوشل میڈیا پر تیزی سے وائرل ہو رہی ہے جس میں انہوں نے اپنے قریبی دوستوں کے بیٹے اور بہو کی علیحدگی سے متعلق ایک واقعہ بتایا جس کے بعد سوشل میڈیا پر قیاس آرائیاں شروع ہو گئیں۔
بشریٰ انصاری نے کہا کہ ہمارے دو بہت قریبی دوست ہیں۔ ان کی بہو نے صاف کہہ دیا تھا کہ وہ اپنے شوہر کے والدین کے ساتھ نہیں رہنا چاہتی جبکہ ان کا صرف ایک ہی بیٹا تھا۔ والدین نے بہو سے کہا کوئی بات نہیں بیٹا ہم استطاعت رکھتے ہیں۔ ہم خود ایمار کے ایک خوبصورت اپارٹمنٹ میں منتقل ہو جاتے ہیں تم اپنے شوہر کے ساتھ یہاں رہو لیکن ان کے بیٹے نے یہ بات ماننے سے انکار کر دیا۔
بشریٰ انصاری کے مطابق ان کے بیٹے نے کہا کہ میں اپنے والدین کو چھوڑ کر نہیں جا سکتا۔ ادکارہ نے مزید کہ اکہ وہ لوگ بھی برے نہیں تھے اور ان کی بہو بھی اچھی تھی بس وہ اپنی آزادی چاہتی تھی۔
اگرچہ بشریٰ انصاری نے گفتگو کے دوران کسی فرد یا خاندان کا نام نہیں لیا تاہم سوشل میڈیا پر متعدد صارفین کا دعویٰ ہے کہ وہ اداکارہ سائرہ یوسف اور اداکار شہروز سبزواری کی طلاق کے پس منظر کی طرف اشارہ کر رہی تھیں۔ تاہم اس حوالے سے بشریٰ انصاری نے خود کسی نام کی تصدیق نہیں کی نہ ہی سائرہ یوسف یا شہروز سبزواری نے اس پر کوئی ردعمل دیا ہے۔
