بھارت میں کاکروچ جنتا پارٹی نامی تحریک نے منگل کو وزیرِ تعلیم دھرمیندر پردھان کے استعفے تک اپنی احتجاجی مہم جاری رکھنے کا اعلان کیا ہے۔
یہ اعلان ایک ایسے وقت میں سامنے آیا ہے جب پیر کو نئی دہلی میں ہونے والے احتجاجی مظاہروں کے دوران جھڑپوں میں کم از کم 180 افراد زخمی ہوگئے۔
پیر کے روز ہزاروں مظاہرین بھارتی دارالحکومت کے مرکزی علاقے میں جمع ہوئے اور وزیرِ تعلیم دھرمیندر پردھان کے استعفے کے ساتھ ساتھ امتحانی نظام میں وسیع اصلاحات کا مطالبہ دھرایا۔
یہ بھی پڑھیں: ’استعفیٰ دو ورنہ پارلیمنٹ اکھاڑ کربھارت کو نیپال بنا دیں گے‘، مودی حکومت کے خلاف احتجاج شدت اختیار کرگیا
یہ مظاہرہ سوشل میڈیا سے ابھرنے والی کاکروچ جنتا پارٹی تحریک کی طاقت کا مظہر قرار دیا جا رہا ہے۔
مئی میں شروع ہونے والی اس تحریک نے سوشل میڈیا پر لاکھوں حامی حاصل کیے ہیں اور اسے وزیرِ اعظم نریندر مودی کی 2024 میں تیسری مدتِ اقتدار کے آغاز کے بعد ان کی حکومت کو درپیش بڑے عوامی چیلنجز میں سے ایک سمجھا جا رہا ہے۔
تحریک کے رہنما آشوتوش رانکا نے سوشل میڈیا پر اپنے بیان میں کہا کہ وہ پیچھے نہیں ہٹیں گے۔ ’۔۔۔دھرمیندر پردھان کو برطرف کرنا ہوگا۔‘
JUST IN – India's 'Cockroach' movement vows to protest until education minister resigns pic.twitter.com/JugQBVsebJ
— Insider Paper (@TheInsiderPaper) July 21, 2026
منگل کو بھی سینکڑوں مظاہرین جنتر منتر کے احتجاجی مقام پر موجود رہے، جہاں بیشتر شرکا نے صرف وزیرِ تعلیم کے استعفے ہی نہیں بلکہ پورے تعلیمی نظام میں بنیادی اصلاحات کا مطالبہ بھی دہرایا۔
پیر کو پولیس نے مظاہرین کو پارلیمنٹ کی جانب بڑھنے سے روکنے کے لیے آنسو گیس کی شیلنگ کی اور لاٹھی چارج کیا۔
یہ گزشتہ تقریباً 5 برس کے دوران دہلی میں ہونے والے بڑے عوامی مظاہروں میں شمار کیا جا رہا ہے۔
مزید پڑھیں: مقبوضہ جموں و کشمیر کے کٹھ پتلی وزیراعلیٰ عمر عبداللہ دہلی میں احتجاج پر کیوں مجبور ہوئے؟
دہلی پولیس کے مطابق مظاہرین اور سیکیورٹی اہلکاروں کے درمیان جھڑپوں میں 178 افراد زخمی ہوئے، جن میں 118 پولیس اہلکار بھی شامل ہیں، جبکہ متعدد سینیئر افسران بھی زخمی ہوئے۔
پولیس نے ایک بیان میں مظاہرین کے رویے کو ’بے قابو، جارحانہ اور پرتشدد‘ قرار دیتے ہوئے کہا کہ جھڑپ کے دوران تقریباً 60 مظاہرین بھی زخمی ہوئے۔
دوسری جانب احتجاج کے منتظمین نے پولیس کی کارروائی کو ’اختیارات کا ناجائز استعمال‘ قرار دیتے ہوئے دعویٰ کیا کہ سینکڑوں مظاہرین تشدد کا نشانہ بنے۔
Police caned protesters in New Delhi as thousands gathered for a ‘Cockroach’ movement march on parliament demanding the resignation of education minister Dharmendra Pradhan https://t.co/21rvMs3Bad pic.twitter.com/XGKH4hvaue
— Reuters (@Reuters) July 20, 2026
میڈیا رپورٹس کے مطابق کاکروچ جنتا پارٹی کے ترجمان آشوتوش رانکا نے نے اسے بھارتی جمہوریت کی تاریخ کا شرمناک دن قرار دیا ہے۔
’ایک حقیقی مسئلے پر احتجاج کرنے والے ایماندار طلبہ کو دہلی پولیس نے بے رحمی سے تشدد کا نشانہ بنایا۔‘
رانکا نے بتایا کہ انہوں نے پیر کو مرکزی وزیر جے پی نڈا سے ملاقات بھی کی، تاہم حکومت نے اب تک ان کے مطالبات پر کوئی مثبت ردعمل نہیں دیا۔
مزید پڑھیں: مودی سرکار کے خلاف طلبہ کی بغاوت، پارلیمنٹ کی جانب احتجاجی مارچ، وزیر تعلیم کے استعفے کا مطالبہ
بھارت میں تیز معاشی ترقی کے باوجود لاکھوں نوجوان اب بھی مستقل اور مناسب آمدنی والی ملازمتیں حاصل کرنے میں مشکلات کا سامنا کر رہے ہیں، جس کے باعث عوامی بے چینی میں اضافہ ہوا ہے۔
یہ احتجاج حالیہ مہینوں میں سامنے آنے والے متعدد امتحانی اسکینڈلز کے بعد شروع ہوا، جنہوں نے ملک کے امتحانی نظام پر عوامی اعتماد کو شدید متاثر کیا ہے۔
گزشتہ ماہ سوالیہ پرچہ لیک ہونے کے بعد 22 لاکھ میڈیکل طلبہ سے سخت سیکیورٹی میں دوبارہ امتحان لیا گیا، جبکہ اس سے قبل تقریباً 20 لاکھ ہائی اسکول طلبہ کے امتحانات کے آن لائن مارکنگ سسٹم سے متعلق بھی ایک الگ تنازع سامنے آیا تھا۔
