نائب وزیراعظم و وزیر خارجہ اسحاق ڈار شنگھائی تعاون تنظیم کی کونسل آف فارن منسٹرز کے اجلاس میں شرکت کے لیے آج کرغزستان جائیں گے۔
اپنے دورے کے دوران وہ پاکستانی وفد کی قیادت کرنے کے ساتھ صدرِ کرغزستان اور رکن ممالک کے وزرائے خارجہ سے اہم دوطرفہ ملاقاتیں بھی کریں گے۔
یہ بھی پڑھیں: شنگھائی تعاون تنظیم کی سربراہی پاکستان کے لیے سنگِ میل ثابت ہوگی، اسحاق ڈار
وزیر خارجہ اسحاق ڈار 23 اور 24 جولائی کو کرغزستان کے شہر چولپون آتا میں ہونے والے ایس سی او کی کونسل آف فارن منسٹرز کے اجلاس میں شرکت کے لیے پاکستانی وفد کی قیادت کریں گے۔
دفتر خارجہ کے مطابق کرغزستان کے وزیر خارجہ ژین بیک کولوبایف کی دعوت پر اسحاق ڈار اجلاس میں شرکت کریں گے، جس میں شنگھائی تعاون تنظیم کے تمام رکن ممالک پاکستان، چین، بیلاروس، بھارت، ایران، قازقستان، کرغزستان، روس، تاجکستان اور ازبکستان کے وزرائے خارجہ شریک ہوں گے۔
بیان کے مطابق کونسل آف فارن منسٹرز شنگھائی تعاون تنظیم کا تیسرا اعلیٰ ترین فورم ہے، جہاں بین الاقوامی تعلقات، علاقائی و عالمی صورتحال، خارجہ پالیسی اور سیکیورٹی سے متعلق اہم امور پر غور کیا جاتا ہے۔
مزید پڑھیں: اسحاق ڈار سے شنگھائی تعاون تنظیم کے سیکریٹری جنرل کی ملاقات، علاقائی تعاون کے فروغ پر اتفاق
دفتر خارجہ نے بتایا کہ اسحاق ڈار اپنے دورہ کرغزستان کے دوران صدرِ کرغزستان سے بھی ملاقات کریں گے، جبکہ ایس سی او اجلاس کے موقع پر رکن ممالک کے وزرائے خارجہ کے ساتھ متعدد دوطرفہ ملاقاتیں بھی کریں گے۔
ان ملاقاتوں میں دوطرفہ تعلقات، علاقائی تعاون اور باہمی دلچسپی کے مختلف امور پر تبادلہ خیال متوقع ہے۔
