پاکستان پیپلز پارٹی نے 25 جولائی کو یومِ جمہوریت کے سلسلے میں مینارِ پاکستان پر ہونے والا جلسہ انتظامی معاملات کے باعث گورنر ہاؤس منتقل کرنے کا اعلان کر دیا ہے۔ پارٹی کے مطابق جلسے کا مقام تبدیل کیا گیا ہے، تاہم پروگرام کی تمام سرگرمیاں پہلے سے طے شدہ شیڈول کے مطابق ہی ہوں گی۔
اس سے قبل پیپلز پارٹی کی جانب سے جلسے کی بھرپور تیاریاں کی جا چکی تھیں۔ 24 جولائی کی صبح مینارِ پاکستان پر اسٹیج نصب کر دیا گیا تھا جبکہ کرسیاں بھی لگائی جا رہی تھیں۔ پیپلز پارٹی لاہور کی مرکزی قیادت پوری رات کارکنوں کے ساتھ مینارِ پاکستان پر موجود رہی۔ پارٹی نے محکمہ موسمیات کی جانب سے 25 جولائی کو بارش نہ ہونے کی پیشگوئی کے باوجود ممکنہ بارش سے نمٹنے کے لیے بھی خصوصی انتظامات کیے تھے۔
یہ بھی پڑھیں:پیپلز پارٹی کا کوٹلی میں انتخابی جلسہ: گلگت بلتستان کے بعد آزاد کشمیر میں بھی حکومت بنائیں گے، بلاول بھٹو
صدر پیپلز پارٹی لاہور فیصل میر نے گورنر ہاؤس کے باہر میڈیا سے گفتگو کرتے ہوئے کہا کہ آج پورا دن پنجاب حکومت اور انتظامیہ کے ساتھ صورتحال پر کشیدگی رہی، تاہم پارٹی قیادت کی ہدایت پر اس معاملے کو مزید بڑھانے کے بجائے مذاکرات کا راستہ اختیار کیا گیا۔ انہوں نے کہا کہ انتظامیہ سے بات چیت کے بعد فیصلہ کیا گیا ہے کہ جلسہ اب مینارِ پاکستان کے بجائے گورنر ہاؤس لاہور میں منعقد ہوگا۔
فیصل میر نے کہا کہ مقام کی تبدیلی کے علاوہ پروگرام میں کسی قسم کی تبدیلی نہیں کی گئی۔ پارٹی قائدین کی تقاریر، ملی نغمے، موسیقی، سابق صدر آصف علی زرداری کی سالگرہ کے موقع پر 24 فٹ بلند کیک کاٹنے کی تقریب اور آتش بازی سمیت تمام سرگرمیاں پہلے سے طے شدہ شیڈول کے مطابق ہوں گی۔
رات کے آدھے پہر پاکستان پیپلز پارٹی لاہور کے صدر فیصل میر تنظیمی عہدے داروں اور پارٹی کارکنان کے ساتھ مینار پاکستان کے تاریخی گراؤنڈ میں موجود ہیں اور 25جولائی جلسے کی تیاریوں کا جائزہ لے رہے ہیں
جلسہ تو ہوگا #چلو_چلو_مینار_پاکستان_چلو@BBhuttoZardari @faisalmirppp pic.twitter.com/WZe1cpjYR4— Aftab Haider (@Aftab552572581) July 24, 2026
انہوں نے پیپلز پارٹی کے کارکنوں، عہدیداروں اور حامیوں سے اپیل کی کہ وہ اسی جوش و جذبے کے ساتھ گورنر ہاؤس پہنچیں جس طرح مینارِ پاکستان آنے کی تیاری کی گئی تھی۔ ان کے مطابق شرکا کے داخلے کے لیے الحمرا والا گیٹ کھلا ہوگا جبکہ گورنر ہاؤس کے بڑے لان میں بیٹھنے کے خصوصی انتظامات کیے گئے ہیں۔ فیصل میر نے کہا کہ پارٹی کارکن بھرپور تعداد میں شرکت کریں اور یومِ جمہوریت کی تقریب کو کامیاب بنائیں۔
