اسلام آباد پولیس نے رواں سال کے دوران پولیس خدمت مراکز پر شہریوں کو فراہم کی جانے والی سہولیات کی تفصیلات جاری کر دی ہیں، جن کے مطابق شہریوں کو مختلف پولیس سروسز کی فراہمی کا سلسلہ بلا تعطل جاری ہے۔
ترجمان کے مطابق وفاقی دارالحکومت میں قائم 12 اسٹیٹ آف دی آرٹ پولیس خدمت مراکز شہریوں کو مختلف نوعیت کی خدمات فراہم کر رہے ہیں۔
مزید پڑھیں: گھریلو ناچاقی پر 2خواتین کا قتل، اسلام آباد پولیس نے 48 گھنٹوں میں ملزمان گرفتار کرلیے
ان مراکز میں ایف سکس، جی نائن، ڈپلومیٹک انکلیو، ایچ الیون، بنی گالہ، چیمبر آف کامرس، سواں گارڈن، کھنہ، جی 14، گلبرگ گرین، ڈی سی آفس اور موبائل وینز شامل ہیں۔
رپورٹ کے مطابق رواں سال پولیس خدمت مراکز سے 21 ہزار 160 کریکٹر سرٹیفکیٹس جاری کیے گئے، جبکہ 977 گاڑیوں کی ویری فکیشن بھی کی گئی۔
اسی عرصے کے دوران 13 ہزار 321 کرایہ داروں کا اندراج کیا گیا، جبکہ 29 ہزار 355 شہریوں کی جنرل پولیس ویری فکیشن مکمل کی گئی۔
ترجمان نے بتایا کہ رواں سال 6 ہزار 163 شہریوں کی درخواستوں پر گمشدگی رپورٹس درج کی گئیں، جبکہ 727 گھریلو ملازمین کی رجسٹریشن بھی عمل میں لائی گئی۔
رپورٹ کے مطابق پولیس خدمت مراکز میں 5 ہزار 597 غیر ملکیوں کی رجسٹریشن کی گئی، جبکہ 4 ہزار 911 غیر ملکیوں کو ملک چھوڑنے کے سرٹیفکیٹس بھی جاری کیے گئے۔
اس موقع پر سی پی او/آئی جی اسلام آباد سید علی ناصر رضوی نے کہا کہ شہریوں کو ایک ہی چھت تلے مزید بہتر سہولیات فراہم کرنے کے لیے ایف سکس پولیس خدمت مرکز کو مزید اپ گریڈ کیا گیا ہے۔
آئی جی اسلام آباد کا کہنا تھا کہ اسلام آباد پولیس کا اولین مقصد شہریوں کو بہترین سہولیات کی فراہمی اور ان کی شکایات کا بروقت ازالہ ہے۔ انہوں نے کہا کہ اسلام آباد پولیس اور اس کی پوری ٹیم عوام الناس کی خدمت کے لیے ہر لمحہ مصروفِ عمل ہے۔
