وزیراعظم محمد شہباز شریف نے پاکستان کے پہلے نشانِ حیدر یافتہ کیپٹن محمد سرور شہید کے 78ویں یومِ شہادت پر انہیں زبردست خراجِ عقیدت پیش کرتے ہوئے کہا ہے کہ پوری قوم وطن کے دفاع کے لیے ان کی بے مثال قربانی کو سلام پیش کرتی ہے۔
وزیراعظم نے اپنے پیغام میں کہا کہ کیپٹن محمد سرور شہید نے 27 جولائی 1948 کو پہلی کشمیر جنگ کے دوران دشمن کا تاریخی جرات اور بہادری سے مقابلہ کرتے ہوئے جامِ شہادت نوش کیا۔ انہوں نے کہا کہ کیپٹن محمد سرور شہید وہ پہلے پاکستانی تھے جنہیں مادرِ وطن کے دفاع میں عظیم قربانی کے اعتراف میں نشانِ حیدر سے نوازا گیا۔
مزید پڑھیں:عظمت شہدا کنونشن: وزیراعظم شہباز شریف فرط جذبات سے آبدیدہ ہو گئے
شہباز شریف نے کہا کہ کیپٹن محمد سرور شہید نے میدانِ جنگ میں فرض شناسی، شجاعت، بہادری اور بہترین پیشہ ورانہ حکمتِ عملی کا مظاہرہ کرتے ہوئے ایسی تاریخ رقم کی جو ہمیشہ یاد رکھی جائے گی۔
وزیراعظم کا کہنا تھا کہ کیپٹن محمد سرور شہید جیسے بہادر سپوت قوم کا فخر اور پاکستان کے ناقابلِ تسخیر دفاع کی ضمانت ہیں۔ انہوں نے اپنی جرات، دلیری اور استقامت سے ثابت کیا کہ دفاعِ وطن کے معاملے میں پوری قوم سیسہ پلائی ہوئی دیوار کی مانند متحد ہے۔
مزید پڑھیں:کیپٹن محمد سرور شہید کا 78واں یوم شہادت، یہ قربانی آج بھی قوم کے لیے مشعل راہ ہے، افواج پاکستان
انہوں نے مزید کہا کہ کیپٹن محمد سرور شہید کا جذبۂ حب الوطنی، فرض شناسی اور میدانِ جنگ میں دی گئی لازوال قربانی آنے والی نسلوں کے لیے مشعلِ راہ ہے۔
وزیراعظم نے اپنے پیغام کے اختتام پر کہا کہ پوری قوم کو کیپٹن محمد سرور شہید سمیت مادرِ وطن کے دفاع میں اپنی جانوں کا نذرانہ پیش کرنے والے تمام بہادر شہداء پر فخر ہے، جن کی قربانیوں کی بدولت پاکستان کا دفاع ناقابلِ تسخیر بنا ہوا ہے۔
