پاکستان اسٹاک ایکسچینج میں بدھ کی صبح شدید فروخت کا رجحان دیکھنے میں آیا، جس کے باع انڈیکس کاروبار کے ابتدائی منٹوں میں ہی 1,300 سے زائد پوائنٹس گر گیا۔
صبح 9 بج کر 35 منٹ پر بینچ مارک کے ایس ای 100 انڈیکس 1,364.62 پوائنٹس یعنی 0.77 فیصد کمی کے بعد 176,259.26 پوائنٹس کی سطح پر ٹریڈ کر رہا تھا۔
یہ بھی پڑھیں: مثبت آغاز کے باوجود اسٹاک مارکیٹ گراوٹ کا شکار، انڈیکس میں 1,300 پوائنٹس سے زائد کمی
مارکیٹ میں فروخت کا دباؤ آٹوموبائل اسمبلرز، سیمنٹ، کیمیکل، کمرشل بینکوں، تیل و گیس کی تلاش کرنے والی کمپنیوں، آئل مارکیٹنگ کمپنیوں اور بجلی پیدا کرنے والی کمپنیوں سمیت اہم شعبوں میں دیکھا گیا۔
حب پاور، ماری انرجیز، او جی ڈی سی ایل، پاکستان پیٹرولیم لمیٹڈ، پاکستان آئل فیلڈز، پاکستان اسٹیٹ آئل، مسلم کمرشل بینک، میزان بینک اور یونائیٹڈ بینک جیسے بھاری وزن رکھنے والے حصص بھی منفی زون میں ٹریڈ کرتے رہے۔
PSX Opened Negative 👇
☀️ KSE 100 opened negative by -1113.95 points this morning. Current index is at 176,509.93 points (9:45 AM) pic.twitter.com/SBGHSmDeYo— Investify Pakistan (@investifypk) July 29, 2026
منگل کے روز بھی اسٹاک ایکسچینج مندی کے ساتھ بند ہوئی تھی، پیر کے روز ہونے والی نمایاں تیزی کے بعد سرمایہ کاروں نے منافع کے حصول کے لیے فروخت کو ترجیح دی، جس کے نتیجے میں ابتدائی بڑھت برقرار نہ رہ سکی، حالانکہ ریفائنری سیکٹر کے لیے حکومتی پالیسی سپورٹ کی اطلاعات پر اس شعبے میں خریداری کا رجحان دیکھا گیا تھا۔
منگل کو کاروبار کے اختتام پر کے ایس ای 100 انڈیکس 638.45 پوائنٹس یعنی 0.36 فیصد کمی کے بعد 177,623.88 پوائنٹس پر بند ہوا تھا۔
یہ بھی پڑھیں: مشرقِ وسطیٰ کشیدگی کے اثرات، اسٹاک ایکسچینج میں 1,200 سے زائد پوائنٹس کی کمی
دوسری جانب عالمی مارکیٹوں میں بدھ کے روز ایشیائی حصص بازار ایک روز قبل کی شدید گراوٹ کے بعد سنبھلتے دکھائی دیے۔
بڑی ٹیکنالوجی کمپنیوں کے مالی نتائج اور امریکی فیڈرل ریزرو کے آئندہ پالیسی فیصلے سے قبل سرمایہ کار مصنوعی ذہانت سے متعلق سرمایہ کاری، بڑھتے ہوئے مسابقتی دباؤ اور بلند قیمتوں کے حوالے سے محتاط نظر آئے۔
جنوبی کوریا کی چپ ساز کمپنی ایس کے ہائنکس کے مضبوط مالی نتائج نے مارکیٹ کے خدشات میں کچھ کمی پیدا کی، جس کے بعد کوسپی انڈیکس ابتدائی کاروبار میں ایک فیصد سے زائد بڑھ گیا، جبکہ کمپنی کے حصص میں بھی تقریباً 2 فیصد اضافہ ریکارڈ کیا گیا۔
اسی طرح جاپان کا نکی انڈیکس تقریباً ایک فیصد بڑھا، جبکہ جاپان کے علاوہ ایشیا پیسیفک حصص کا ایم ایس سی آئی انڈیکس بھی 0.8 فیصد اضافے کے ساتھ ٹریڈ کرتا رہا، اگرچہ یہ جولائی کے دوران مجموعی طور پر نمایاں ماہانہ کمی کی جانب گامزن ہے۔
